Masat yan ( 9 ) shangai chyinghkai ( Midwife ) jawng hpaw hpawng lamang galaw
Wunpawng Mungdan Shanglawt Asuya Mungdan Hkamja Dap kaw nna hpaw sharin ya ai masat yan ( 9 ) shangai chyinghkai ( Midwife ) jawng hpaw hpawng hpe October shata praw 5 ya shani hkying 10:00am aten hta Laiza Muklum Ginjaw Hkamja Dap, Wunjat Gawknu kaw galaw ai lam chye lu ai.
Yaw shada lam hpe Hkamja Dap Ningtau Amu Madu Du Up Kadang Manau Tu Awng kaw nna ya na zawn tsun ai. “Wunpawng amyusha ni mayat maya, gumrawng gumra shangai chyinghkai ai hta langai mi pi n si u ga, ma kanu ni bai shangai ai ma ni mung, langai mi pi n si ai sha hkamja bawngring ai hku nna, shangai chyinghkai, shaprat la lu na matu hte Wunpawng amyusha ni law htam mayat maya na matu madung yaw shada ai re” nga nna tsun ai.
Anhte amyusha hkamja lam hta amyusha ni kaji kaba mahkra tsi hpaji hpe chye da nna, hkamja lam hpe sharin ngut ai hpang, kaga magam bungli hpe galaw sa wa yang gaw amyusha hkamja san seng lam hta grau nna galu kaba awng dang wa na re. Dai re majaw Wunpawng amyusha kaji kaba yawng hkamja san seng lam ningpawt ninghpang tsi hpaji hpe shawng sharin da yang grau nna akyu nga na re lam Du kaba matut tsun ai.
Midwife hte Nursing jawngma ni hpe pre class hta shata 5 shawng sharin na rai nna, sharin ginhpan ( subject ) ni gaw, ningpawt ninghpang Hpyen htung lai, Jinghpaw laika, Ninggawn mungmasa hte Htunghking lam ni sharin ya na re. Dai sharin ngut ai hpang February shata kaw nna gaw Midwife hte Nursing hpe bai garan nna sharin sa wa na re lam chye lu ai.
Midwife hte Nursing hpe garan ai hta Dakakasu lung yu ai ni hte janmau lu sai ni hpe gaw Nursing kaw bang na rai nna, Tsang 10 awng ai ni hte tsang 10 a npu na ni hpe gaw Midwife jawng kaw bang na re. Sharin hkamla na jawngma ni yawng marai 122 re lam chye lu ai.
Midwife hte Nursing kaw ningtawn ai jawngma ni hpe laksan lata la nna, maigan de Sara Wun jawng shing nrai Midwife jawng hpe bai matut shalung na masing nga ai lam chye lu ai.
