Masha pru shang gawnhkang tara hte lam masan ningmu jahpaw bawngban hpawng galaw
Masha pru shang gawnhkang (Immigration) tara hte lam masan ningmu jahpaw bawngban hpawng hpe July shata praw (3) ya jahpawt hkying 9:00am kaw nna 12:30pm aten laman Laiza Hotel zuphpawng gawk kaw galaw ai lam chye lu ai.
Hpawng hta Lat Du Up Jum Chyin-yu La Ring (Ginjaw Immigration Makan Dap Matsun Du) kaw nna Immigration tara hte lam masan hpe tsun sang lang dan ai lam galaw ai. Salang Kaba Hpunggan Zau Gun (Mungchying Uphkang Dap Ningtau Lithkam) kaw nna mung hpaji jaw mungga shaga ai re.
Immigration Makan Dap ni galaw nga ai magam bungli ni hpe mungshawa dap shawa yawng chye na hkawn hkrang na matu ningmu jahpaw hpawng galaw ai rai nna, Maigan masha jahpan bang lakmat, Maigan masha pru/shang hte seng ai lam, Mungdan masha ni a lam hte mungchying sha masat hte seng ai lam ni hpe madung tsun sang lang bawngban ai lam galaw ai.
Immigration bungli gaw Mungdan langai hta grai ahkyak ai bungli rai nna, amyu langai nhtum mat na matu gaw Immigration tara grai ahkyak ai lam, Maigan masha langai hpe Mungchying sha masat jaw shut ai rai yang Mungdan sum machyi wa chye ai majaw Immigration tara hte Maigan masha ni hpe atsawm jum tek ra ai lam, Ginjaw Immigration Makan Dap Matsun Du tsun ai.
Masha pru shang gawnhkawng (Immigration) makan dap hpe 2003 ning June shata 10 ya shani hpaw hpang wa sai rai nna, Maigan masha (FRC) ni hpe lam masan hte hkrak galaw sa wa na matu yaw shada da ai lam chye lu ai.
Hpawng hta Dai Lawn Rung na lit nga ai salang ni, Mungchying uphkang dap magam gun ni, Magam dap, Makan dap shagu na magam gun ni, Immigration magam gun ni hte Laiza Muklum lawk salang ni sa du shang lawm ai lam chye lu ai.
