Mawdaw cycle gawn hkang tara hkaw tsun hpawng galaw

Laiza Muklum Balik Dap, mawdaw cycle gawnhkang hpung kaw nna, woi awn ai mawdaw cycle gawnhkang tara hkaw tsun hpawng hpe October shata praw 3 ya shani hkying 1:00pm aten, Laiza Lahta Tsang jawng kaw galaw la lu sai lam chye lu ai.

Mawdaw cycle gawnhkang Du Lahtaw Naw Naw Lat kaw nna, yaw shada lam hpe ya na zawn tsun ai.

“Muklum kata hta mawdaw cycle gawnhkang tara hpe nchye na shut shai ai lam ni nga ai re majaw, jawngma ni hku nna mawdaw cycle gawn hkang tara hpe chye na wa lu na matu, asak 18 ning nhpring ai ma ni cycle gau hkawm ai lam ni grai nga ai re, anhte seng ang ai mawdaw cycle gawn hkang hpung kaw nna mung tsun sanglang dan ai lam nga ai raitim, kanu kawa ni gaw njawn shangun sai nga na gade nna yang asak nhpring shi ai ma ni cycle jawn hkawm ai hpe mu mada ai, dai majaw jawng kaw gaw asak nhpring ai ni hte hpring ai ni yawng nga ai majaw, ndai hku hkaw tsun hpawng hpe galaw ai re”

Dai ni hkaw tsun hpawng hta asak 18 ning nhpring shi ai jawngma ni gaw cycle n gau lu na, asak hpring sai ni mung, mawdaw cycle laisin lu ra na, lam tara ni hte mawdaw cycle gau gawn hkawng tara ni hte seng ai lam ni hpe madung tawn na hpe hkaw tsun ai lam galaw ai re.

Hkaw tsun hpaw hta tsang 6 kaw nna tsang 10 jawngma ni hpe hkaw tsun dan ai lam galaw ai hta jawngma yawng marai 400 jan madat hkam la nna, lai wa sai September shata hta gaw Laiza Lapran Tsang jawng kaw galaw ai lam chye lu ai.

Mawdaw cycle gawn hkang tara hte seng nna, shaning shagu jawng shagu hta hkaw tsun ai lam ni galaw ai rai nna, laning mi hta yawm htum kalang galaw ai lam chye lu ai.