Mawmau Bum kaw lung seng nhkun ga shingbut gyi nna marai 2 si, marai 2 hkala hkrum
Hpakant, Mawmau Bum mare sinpraw maga Jake land hte Shwe Nagar Poe Kong company bungli lawk dingsa lapran kaw June shata 21 ya shana de hkying 3:30pm aten hta lung seng nhkun na ga shingbut gyi wa ai majaw lung seng htu nga ai marai 4 kaw na marai 2 si, marai 2 hkala mat ai lam chye lu ai.
“Jake Land ni htu nna ngam da ai lung seng nhkun kaw Lung seng htu nga yang Pe 80 daram re ai kaw na ga shingbut gyi wa ai majaw Mahkaw Tang Gun asak 42 ning hte Maraw Bawk Nu asak 22 ning yan gaw hkala hkrum nna Hpakant tsi rung kaw tsi tsi gawn lajang nga ai. Maraw Brang Tawng asak 47 ning hte Mahkaw Awng Lat asak 24 ning yan gaw ga shingbut gyi bun ai kata hta si rawng mat ai. Ya aten du hkra garai nlu shaw shi ai. Ga kaput mat ai marai 2 hpe gaw Makoi mayang karum ning tum hpung ni hte company ni hku nna jawm garum let tam htu shaw ai lam galaw nga ai re” nga nna Salang Jangmaw Nawng Lat tsun dan ai.
Anhte Hpakant ginra kaw gaw jauman masha ni a galaw lu galaw sha na ahkaw ahkang hpe tara Upadi hte seng nna asuya hku nna mung tsawmra mi yu lajang ra na re. Hpa mi raitim ya lanam ta shang wa sai re majaw ahkyak dik gaw ndai tara Upadi hte anhte mungshawa ni a ahkaw ahkang hpe anhte gara hku galaw na ngu ai hte anhte asak jahkrung ra na re. Company ni kaw nna galaw ai lai len ladat ni hpe mung gawn hkang ra ai lam law law nga ai lam ni hpe mung Upadi hte hkrak gawn hkang ra na re. Dai nrai yang shaning shagu shingra tara a majaw nre sha ga shingbut a majaw ga gyi bun ai law law nga ai re majaw tara Upadi hku nna ja ja ahkak la yang loi hkyem sa mat na re nga nna Salang wa shi a ningmu hpe matut tsun dan ai.
