Mayan mare hte Loihkaw lapran na mile (21) gumshem Myen hpyen pawnghpawm shagyit (Gate) hpe KIA ni sa htim gap
KIA Masat (2) Dap Ba, Masat (11) Dap Dung ginra, Mayan mare hte Loi Hkaw mare lapran na mile (21) gumshem Myen hpyen ni a pawnghpawm shagyit (Gate) hpe June shata 30 ya jahpawt hkying 3:00am hte 5:05am aten laman KIA ni sa htim gasat ai lam na chye lu ai.
Mayan mare makau na Myen hpyen dap Hk.L.Y (260) dap hpe sinat kaba hte 2 lang shawng sa gap bun ai dai hpang, pawnghpawm shagyit (Gate) hpe bai sa htim gap ai re lam, shawng lam na lit nga ai salang ni kawn chye lu ai.
Gasat poi byin ai hta gumshem Myen balik langai si nhtawm, langai gaw hkala ai rai nna, shagyit makau kaw nga ai mungshawa marai langai mung asak si sum mat ai lam, buga masha ni tsun ai.
Majan byin nga ai aten, lai sa lai wa mungshawa ni a modo, cycle ni hpe gumshem Myen hpyen ni n shalai, jahkring da ai rai tim, majan zim ai hpang hkying 10:30am aten daram kaw nna, lai sa lai wa bai nga sai lam chye lu ai.
Hkying 2:00pm aten daram hta gumshem Myen hpyen ni gaw, KIA Masat (11) Dap Dung hpyen dap hpe Jet Figther nbungli langai hte bawm kalang wa jahkrat bun ai raitim, hkala nba hpa nnga ai lam, lit nga ai salang ni tsun ai.
June shata 29 ya shana daw hkying 3:30pm aten kaw na hkying 3:45pm aten laman hta mung, KIA Masat (5) Dap Ba, Masat (25) Dap Dung ginra, Kunglaw KBC nawku jawng kawng kaw nga ai gumshem Myen hpyen ni kaw nna, KIA ni nga ai Chyin Yu Post hte Salawng Kawng maga de laknak kaba 105mm, 120mm hte 10 jan lang gap bun ai lam chye lu ai.
