Mazut roi rip sat kau hkrum ai KBC Sasana Saranum yan 8 ning ladu hkrum sai
Gumshem Myen hpyen dap ni mazut roi rip sat kau hkrum ai, KBC laika hpaji Sasana Saranum Maran Lu Ra hte Saranum Tangbau Hkawn Nan Tsin yan, asak ap nawng mat ai, 8 ning ladu hkrum sai re lam chye lu ai.
Lai wa sai 2015 ning January shata 19 ya shana, Mungmau Ginwang, Kawnghka mare hta gumshem Myen hpyen dap ni a lata hta mazut roi rip sat kau hkrum ai rai nna, dai ni January shata 19 ya shani gaw 8 ning ladu hkrum sai re.
Saranum yan a akyu hpyi hpawng hpe KBC Ginjaw kaw nna woi awn ai hte 2022 ning (7) ning ladu hkrum du hkra, shaning shagu galaw lai wa sai raitim, 8 ning ladu hkrum akyu hpyi hpawng hpe gaw lam amyu myu, masa amyu myu a majaw, KBC Ginjaw kaw nlu galaw mat ai re lam chye lu ai.
Sasana Saranum yan mazut roi rim sat kau hkrum ai manghkang hte seng nna, dai ni du hkra teng man ai mahtai kaja nlu shi ai raitim, matut nna teng man ai mahtai kaja lu hkra shakut nga ding yang re hpe mung chye lu ai.
