Mazut roi rip zingri sat hkrum ai Saranum yan a 5 ning ladu hkrum myit dum akyu hpyi hpawng galaw
Mungmyit Sinli Ga (Kachin Sub-state), Mungmau Ginwang Amyu Shayi Komiti kawn woi awn nna, mazut roi rip zingri sat hkrum ai KBC laika sasana kaw ap nawng ai, Saranum Tangbau Hkawn Nan Tsin hte Saranum Maran Lu Ra yan a 5 ning ladu hkrum ai myit dum akyu hpyi hpawng hpe, Mungmau Ginwang, Namtau Buga Hkawng Hka mare kaw January shata 19 ya shani galaw ai lam chye lu ai.
Hpawng lamang hta saranum yan hpe myit dum ai hku nna masat shadaw hpe shan nga lai wa ai nawku jawng wang kaw galaw tawn ai rai nna, masat shadaw hpaw hpawng hpe mung galaw ai re.
“Myit dum kyuhpyi hpawng galaw ai lam gaw, anhte Saranum yan hpe grai tsawra myit dum, chyeju dum ai hku nna akyu hpyi ai lam re. Daini du hkra mahtai jawm tam ai hta mahtai nlu hkraw ai re majaw, Karai Kasang nan mahtai jaw ya u ga, tara dara ya lu ai mung Karai Kasang sha re majaw, anhte Karai Kasang hpe kamhpa ai hte mahtai lu na matu rai nga ai” nga nna Mungmau Ginwang Amu Madu Rev. Lahpai Zau Ra tsun ai.
Daini ndai mahtai lu na matu gaw, anhte a Mungdan sat lawat hku nna gaw grai yak na re. Ratim mung makam masham wuhpung wuhpawng re majaw KBC hku nna mung, kaga makam masham hpung, Wunpawng sha ni yawng akyu jawm hpyi jang Karai Kasang gaw matai jaw, mahtai jaw ya na re majaw, yawng akyu jawm hpyi ga nga nna Rev. Lahpai Zau Ra matut tsun ai.
Akyu hpyi hpawng lamang hta Mungmyit Sinli Ga Amyu Shayi Komiti ni, nawku hpung woi sara/num ni hte mungshawa kanu kawa ni yawng marai 1600 daram sa du shang lawm ai lam chye lu ai.
Saranum yan hpe myit dum akyu hpyi hpawng hpe Myitkyina makau grupyin kaw na hpungshawa ni gaw Jaw Bum, Nawng Nang mare kaw galaw ai rai nna, Ginwang shara shagu hte Buga shara shagu hta mung myit dum akyu hpyi hpawng galaw ai lam chye lu ai.
Saranum yan gaw lai wa sai 2015 ning January shata 19 ya shana hta Mungmau Ginwang Namtau Buga, Kawng Hka mare hta KBC hpaji sasana hta sa ap nawng nga ai ten, shan nga ai nta kaw nan mazut roi rip sat kau hkrum ai re.
