Menje Kawng Ra lawk kaw nta lahkawng wan hkru mat

Manje, Kawng Ra lawk kaw February shata 6 ya jahpawt hkring 9:30am aten hta Salang Lahpai La Myaw hte kasha Lahpai Zau Seng yan a n-ta lahkawng wan hkru mat ai lam chye lu ai.

Wan hkru wa ai gaw, Salang Lahpai La Myaw a nta kaw shakap da ai meter box wan sumri kaw na hkru hpang wa ai re. Nta madu jan gaw kan machyi nna Manmaw tsi rung de sa mat ai, nta madu wa gaw hka htung hkaraw de sa rawng mat ai aten hta hkru wa ai re lam, Manje mare na Salang langai tsun dan ai.

Arung arai hpa mung nlu la mat ai sha n-ga gumhpraw Kyats  2,000,000 ( Sen Hkun ) daram mung hkru lawm mat ai, Kasha Lahpai Zau Seng a n-ta kaw hkru hpang wa yang, wan sat dap ni du wa ai majaw arung arai yawng bai lu htawk la ai, nga nna Salang wa matut tsun ai.

Wan hkru hkrum ai nta masha ni gan rawng na matu, Kawng Ra mare na mare Salang ni woi awn nhtawm, kawa ginsum bai galaw ya ai lam chye lu ai.

Wan hkru lawm mat ai nta hte arung arai manu yawng rai yang Kyats 10,000,000 ( Sen Latsa ) jan daram re lam, nta madu wa hpe gaw mare Salang ni a pahkam hte Balik ni woi mat ai lam nnga ai hpe na chye lu ai.