MIEd jawng a 2020-2021 ning jawng lung ladaw nhtoi bai htawt sit
Covid-19 Ana Zinli Makawp Ninghkap Komiti kaw nna ana makawp ninghkap masing hpe nhtoi bai htawt sit da ai re majaw, Mai Ja Yang Institute Of Education (MIEd) kawn mung 2020-2021 ning jawng lung ladaw hpe nhtoi bai htawt sit ai lam chye lu ai.
Jawng mying hpe June shata htum du hkra naw hkap la na re hte jawng hpe July shata praw hta hpaw sa wa na matu Ginjaw Hpaji Dap hte bawngban nna seng ang ai Covid-19 Ana Zinli Ninghkap Makawp Ninghkap Komiti de tang madun da ai lam nga ai. Seng ang ai kaw nna jawng hpaw ahkang jaw ai aten hta jawng hpaw nhtoi hpe bai ndau shana na re lam, MIEd jawng up Sara Kaba Nnye La Raw tsun ai.
Majan lapran hta raitim, gade daram yak hkak ai ten raitim mung, hpaji lam di mat ai nmai re majaw, jawng hpe lu hpaw hkra ladat shaw nna galaw sa wa na re lam, Sara Kaba matut tsun dan ai.
Jawng lung na jawngma ni gaw KIO uphkang ginra, Laiza Mai Ja Yang kata na law malawng re majaw, jawng hpe lu hpaw na ngu myit mada ai lam, jawng gawk kata masha shayawm, nhtoi aten masat nna hpaw sharin ai ladat hte galaw sa wa na re rai nna, jawng nlu hpaw ai masa nga wa yang mung, online hte sharin achyin ai lam hta jawng Sara shalat ai hpe madung dat galaw sa wa na matu hkyen lajang da ai re lam, Sara Kaba Nnye La Raw tsun ai kaw na chye lu ai.
MIEd jawng hta Scholarships hpe shawk shawn mai sai rai nna, jawng hta Jawng Sara hpaji hte Diploma hpe sharin achyin ya nga ai re. Diploma madang hta English hte Chinese ga hpan hpe kung kyang ai sharin ladat hte sharin ya nga ai jawng re hpe mung chye lu ai.
