Miwa Gumsan Mungdan kaw bungli galaw sa ai Myen mung masha ni mayak mahkak hkrum nga
Miwa Gumsan Mungdan, Shan Tung Mungdaw Rung Chyang mare, Wehai Kon Run Nga Company kaw bungli galaw nga ai Myen Mung masha 500 daram gaw shata shabrai nlu ai mayak mang hkang hte aten lai bungli shang ra ai mayak mang hkang a majaw tinang a mungdan de wa mayu ai raitim wa na ahkang pat hkum hkrum nga ai lam na chye lu ai.
Ndai zawn byin hkrum nga ai mayak mang hkang lam hpe Be Jing kaw dap jung ai Myen Mung sumtsan dat kasa rung de shana ai da ai lam nga ai, sumtsan dat kasa rung kaw na ya ten du hkra lajang ya ai lam nnga shi ai re hpe chye lu ai.
Company kata kaw bungli galaw ai masha ni gaw Myen mung masha hpan hkum hkra lawm ai rai nna, Ma kanu, asak kaba sai dinggai dingla ni, ma hkum hte re ai ni mung lawm ai re hpe chye lu ai. Machyi makaw hkrum ai ni hpe mung Company kawn gawn lajang ya ai lam nnga ai sha jahpawt hkying 6:00am kaw nna shana hkying 10:00pm aten lai hkra bungli galaw ra ai mayak ni byin hkrum hkra nga ai re hpe chye lu ai.
Ya aten Corona Vious ana a majaw Miwa Mungdan kata bungli Dabang ni, hkrun lam ni pat ai lam galaw nga ai raitim, Wehai Kon Run Nga Company kata kaw gaw Myen mung masha ni hpe bungli shangun nga ding yang re hpe mung na chye lu ai.
Company kata kaw bungli galaw ai Myen Mung masha ni hpe zin lum wa hkra woi awn galaw ai ni hpe mung Company kaw nna gawt shale nna shadam kau ai zawn re ni galaw ai re lam chye lu ai.
Ya aten Myen Mung de wa na masha jahpan lu hta da ai gaw 200 jan rai nga sai rai nna, Myen Mung sumtsan Dat kasa rung kaw nna hparan ya na hpe myit mada ala nga ai lam matut chye lu ai.
