Miwa Gumsan Mungdan kaw nnan jep mu lu ai tuk kwi wa ana a majaw, wa rem ai mung shawa masha ni hkrit tsang nga

Mungkan Mungdan shara shagu hta chyam bra wa mai ai tuk kwi hpan myu mi hpe Miwa Gumsan Mungdan hta Hpungtang Hpaji ninghkring ni kaw nna jep mu lu ai majaw, Miwa Mung jarit mayan kaw shanu nga ai mung shawa masha ni sha n-ga, KIO uphkang ginra kata, Laiza Muklum kaw na mung mare masha ni hte hyen yen mung shawa ni mung ndai ana kap bra wa na hpe hkrit tsang nga ai lam na chye lu ai.

Ya nnan bai mu ai ndai tuk kwi ana gaw wa ni hta byin ai ana rai nna, masha kaw mung kap bra wa mai ai ana hpan langai mi re hpe mung sawk sagawn lu ai lam na chye lu ai.

Ya na kap bra wa ana hpe hkrit tsang ai majaw, Wa n-gwi rem nna majoi hkit tsang taw ai hku nre sha, ana makawp maga ladat ni hpe tau hkrau madung dat galaw ra na lam, tinang ginra hta tinang rem ai wa ni n machyi hkra makawp maga hkan sa ra ai lam ni hte ndai Wa ana nkap bra hkra dusat rem ai lam hpe ladat jaw jaw hte atsawm hkan nang hkan sa let galaw ra na lam, Hkai Rem Magam Dap Lithkam, Lahta Tsang Hkai Rem Jawng Up, Sara Kaba Kareng Brang Seng kaw nna hpaji jaw tsun ai.

“Wa hpe dat shaprang da ai hku nre sha rawng rem ra na, wa lawng hpe hkrun hkraw san seng hkra tawn na, wa shat kaw wa shan kashin ai ntsin nbang na, masha ni kaw na wa shat nhkan ja lahkawn jaw na, san seng ai shat hte hka bang jaw na, wa ni a masa yu hkaja na hte gawn lajang na, machyi si ai wa hpe nhpya sha na, makawp maga tsi aten dep htu ya na, wa machyi si ai wa lawng hpe tsi hte kashin jasan kau nna she wa bai bang rem na hte wa hpe aten la nna galoi mung yu gawn lajang rem yang gaw anhte a wa ni hpa nbyin na re” nga nna tsun ai.

Ya aten laiza jarit mayan kaw law malawng byin taw ai wa ana gaw kan mase ana Colora ana re lam, Miwa Gumsan Mungdan kaw byin taw nga ai Wa ana ni gaw masha kaw kap wa mai ai hpe grai wa nmu mada ai re majaw, dusat rem ai lam hpe ladat jaw jaw hte grai jahtuk nna galoi mung yu gawn lajang ai lam galaw ai rai yang, ana zinli kaw nna lawt lu na re lam, Sara Kaba matut dan ai kaw na chye lu ai.