MNDAA hte Myen hpyen hpung ni gasat gala majan byin
Mungmyit Sinli Ga (Kachin-Sub-State) KIA Dap Ba 10, Dap Dung 17 ginra hta Kokang (MNDAA) hpyen hpung ni hte Myen hpyen dapnu 88,99 kata na pawng hpawm hpyen hpung ni September shata 19 ya shani hkying 10:30am aten kaw nna hkying 12;30pm aten du hkra gasat gala majan byin ai lam chye lu ai.
“Ndai Myen hpyen hpung ni gaw n dai ginwang kata hpyen shamu shamawt taw ai gaw grai na sai re. Myen hpyen hpung ni, mani kaw nna Man Lun mare de na lung wa ai re. Daini gaw Huli Bum kaw MNDAA hpyen hpung ni hte ninghkap gasat gala majan byin ai re” nga nna shawng lam na salang langai tsun dan ai.
Myen hpyen hpung ni hpyen n gun 70 daram hte htu shadut lung wa ai rai nna MNDAA hpyen hpung ni hte ninghkap gasat gala majan byin ai re.
Ndai majan byin ai shara gaw Huli Bum ntsa kaw byin ai rai nhtawm ya hkyak hkyak ni nawn ai mare masha ni shim lam a matu grai myit tsang ra ai lam, hpyen koi yen ra ai lam, garai nnga shi ai re hpe mung ginra masha langai tsun dan ai.
Shana daw hkying 1:30pm aten daram kawn lahkawng maga matut manoi gasat gala majan bai byin wa ai hte sinat nsen mung dingyang naw ngoi nga ai re.
Ndai ginra kata de Myen hpyen hpung ni, hpyen n gun dingyang lung wa nga ai rai nna hpyen n gun 700 daram ngu sawn lu ai hpyen hpung ni mung dingyang shamu shamawt taw nga ai re lam shawng lam na salang langai tsun ai.
Ndai ginra hta laiwa sai August shata 29 ya shani hta mung Myen hpyen Dapnu 88,99 kata na pawng hpawm hpyen hpung ni hte Kokang (MNDAA) hpyen hpung ni gasat gala majan byin lai wa sai re.
Munggu Ginwang, KIA Dap Ba 6, Dap Dung 36 ginra hta mung Myen hpyen hpung ni shamu shamawt nga dingyang rai nna lahkawng maga naw maja nga dingyang re lam shawng lam shi sawk ni kawn chye lu ai.
