MNDAA Kokang hte Myen hpyen hpung ni gasat gala majan byin
Mungmyit Sinli Ga ( Kachin Sub-state ) KIA Dap Ba 10 Dap Dung 17 ginra hta shamu shamawt hkawm nga ai Myen hpyen dap Ts.K.Hk 10 kata na hpyen n-gun 80 daram hte MNDAA Kokang hpyen hpung ni May shata praw 2 ya shani Loi Dau Bum kaw ang katut gasat gala majan byin ai lam chye lu ai.
Myen hpyen hpung ni gaw Nawng Jawng mare kawn MNDAA hpyen hpung ni nga ai maga de shamu shamawt lung wa ai majaw gasat poi byin ai re lam, shawng lam na salang ni kawn chye lu ai.
Myen hpyen dap kawn simsa lam hpe bawngban jahkrup lu na matu lai wa sai 2018 ning December 21 ya shani hta Jinghpaw Mung hte Sam Mung ( Kachin Sub-state ) hpyen ginjaw jung ai ginra 5 hta shata 4 tup hpyen shamu shamawt ai lam n-galaw na matu ndau laika shapraw da ai re.
Ya na zawn hpyen shamu shamawt ai lam n galaw na matu, ndau shabra laika shapraw da ai raitim, Myen hpyen dap gaw ding yang ngu na shamu shamawt nga ai majaw, Sam Mung, Mungmyit Sinli Ga ginra de gasat gala majan jahkring hkring naw byin nga ai hpe chye lu ai.
Myen Mung a simsa lam hpe tang du hkra, grau nna galaw lu na matu April shata 30 ya shani hta hpyen ginjaw jung ai ginra 5 hta hpyen shamu shamawt lam n galaw na matu June shata 30 ya shani du hkra shata 2 bai jat masat dat ai lam, Myen hpyen dap a ndau laika kaw na chye lu ai.
