MNDAA ni hte Gumshem Myen hpyen ni gasat gala majan byin
Mungmyit Sinli Ga (Kachin Sub-state) KIA Masat (4) Dap Ba npu, Masat (8) Dap Dung ginra, Ga Leng hte Man Mau lapran Loi Chyawk Bum kaw June shata 16 ya jahpawt 8:30am-9:44am aten laman MNDAA hpyen hpung ni hte Gumshem Myen hpyen hpung ni gasat gala majan byin ai lam chye lu ai.
June shata 15 ya shana maga hkying 4:00pm-5:40pm aten laman hta sha Loi Chyawk Bum kaw MNDAA hpyen hpung ni hte Gumshem Myen hpyen hpung ni gasat gala majan byin ai re.
Shana maga 4:00pm aten daram hta mung, Kutkai hte Namhpaka lapran Namhpalun kaw KIA hpyen hpung ni hte Gumshem Myen hpyen hpung ni gasat gala majan byin ai lam na chye lu ai.
Gumshem Myen hpyen hpung ni gaw, rawt malan wuhpung wuhpawng ni dap jung shara la nga ai ginra ni de htu shadut shamu shamawt shang wa ai majaw gasat gala majan matut manoi byin nga ding yang re.
