MNDAA, TNLA ni hte Myen hpyen dap ni gasat gala majan matut byin
Mungmyit Sinli Ga ( Kachin Sub-state ) KIA Dap Ba 10 Dap Dung 2 ginra, Jinghpaw Na Yi mare kaw August shata praw 8, bat hpang 4 ya shana maga hkying 5:00pm aten hta Kokang MNDAA hpyen hpung ni hte Myen Hpyen Dapnu 99 kata na hpyen hpung ni gasat gala majan byin ai lam chye lu ai.
August shata praw 8 ya shani hta sha shana maga hkying 6:50pm aten daram hta Tamunye Muklum makau kaw dap jung nga ai Hk.L.Y 290 hpyen dap hpe TNLA hpyen hpung ni sinat kaba hte sa htim gap dat ai hpang Myen hpyen ni mung sinat kaji kaba hte bai nhtang gap bun ai lam na lu ai.
TNLA ni Hk.L.Y 290 dap kaw sa htim gap dat ai hte Myen hpyen hpung ni n gun 80 daram bai shamu shamawt pru wa ai majaw, dai ni August shata praw 9 ya jahpawt hkying 9:00am aten daram hta MNDAA hte TNLA pawnghpawm hpyen hpung ni Ganhtang bum pawt kaw hkap shingla gap dat ai kawn gasat gala majan matut byin ai lam, shawnglam shisawk ni kawn chye lu ai.
Ya aten hta KIA Dap Ba 10 Dap Dung 2 ginra ni hta Myen hpyen dap, Dapnu 99 kata na hpyen n gun 200 daram mung KIA ni shara jahkrat nga ai post hte nau ntsan ai shara hta shamu shamawt du nga ai lam, shawng lam kaw nga ai salang langai shana wa ai kawn chye lu ai.
