Modo daru hpaw hpawng galaw

Laiza Muklum Pati Komiti kaw na woi awn galaw ai, Modo daru hpaw hpawng hpe November shata praw 7 ya jahpawt hkying 7:00am aten, Sinpraw Majoi Manau Wang kaw galaw ai.

Ndai modo daru gaw 2011 ning majan byin ai hpang shawng nnan lang hpaw hpang ai modo daru re lam chye lu ai.

Yaw shada lam hpe Laiza Muklum Pati Komiti Dinggrin Salang, Salang Kaba Nhkum Lum Tu tsun ai hta “Laiza Muklum gaiwang sha n-ga kaga ginra de hkawmwa hkawmsa ai hta yakhkak dutdang ai lam nnga, Modo hpe hkawn hkra rai na hkawmsa hkawmwa galaw lu na matu, dai zawn galaw ai hta mungshawa ni a arung arai shimlum lam hpe mung atsawm akawm galaw ya lu na matu, shanhte a myitsim myitsa lam hpe modo hpung kaw na jaw lu hkra yaw shada let galaw sa wa ai re” nga nna Salang Kaba tsun ai.

Modo hpung hpe hpan lahkawng garan da ai hta buga htawwa htawsa hpung ni gaw Laiza hte Myitkyina, Manmaw hpung ni rai nna, Family htawwa htawsa hpung ni gaw Laiza hte Mai Ja Yang nga nna mying shamying let, htawwa htawsa lam hpe galaw sa wa na re lam chye lu ai.

Modo daru hpe Sinpraw Majoi Manau Wang kaw galaw da ai rai nna, Laiza hte Mai Ja Yang htawwa htawsa hpung hta modo sara marai 12 rai nhtawm, Laiza hte Myitkyina, Manmaw htawwa htawsa hpung hta modo sara ni yawng marai 22 shanglawm let, htawwa htawsa lam hpe galaw sa mat wa na re lam chye lu ai.