Modo wan nat hkrum ai hte seng nna company kawn amu hpaw da
Myitkyina, Dap Kawng kaw lam galaw nga ai Power Five Star Company a modo lahkawng gaw June shata praw 4 ya jahpawt hkying 2:20am aten daram hta wan nat kau hkrum ai majaw, Power Five Star Company kaw nna amu hpaw da sai lam na chye lu ai.
Modo wan nat kau ya ai gaw kadai ni re ngu ai hpe tup hkrak nchye lu shi ai raitim, CCTV ni hkan hpaw yu nna sagawn nga dingyang re, dai company ni hte shawng de manghkang nga nnga hpe nchye lu ai raitim, wan nat hkrum ai shara kaw wan nat ai sau pung ni, plastic pung ni hpe mu lu ai, modo mung lahkawng re majaw, dasang nat kau da ai re ngu mu mada ai lam, Dap Kawng Mare Uphkang Salang Maran Bawk Naw tsun dan ai.
“Hpa majaw nat ai ngu gaw tsun na yak ai raitim, anhte tak ai gaw ya hte gaw ndai de lam galaw ai le i?. Shata 5/6 daram na wa lam gaw nngut, lam gaw yawng hten ma wa laiwa laisa ni pawt nna nat kau da ai kun?. Shahte gaw Company re majaw bungli kaba galaw ai re majaw gaw shanhte hte shingjawng hkat ai ni mi nga nna nju ai majaw nat ai kun?. Shi na bungli galaw ai bungli masha ni a ntsa kanawn mazum lam kaja kun n kaja kun? Dai baw ni le i? dai lawnglam 3 gaw mu mada lu ai” re nga nna tsun ai.
Ndai zawn modo nat hkrum ai a ntsa ginra masha nkau ni mu mada ai gaw ganing re manghkang mi nga ai raitim gade mi pawt mayu ai mi raitim manang wa a mado hpe ndai zawn n galaw ging ai nga nna tsun nga ma ai re.
Dap Kawng modo lam hpe Power Five Star Company hte Man Pyi Tagon (MPT) Company kawn lit la galaw nga ai hta, Power Five Star Company a modo 2 ya na zawn wan nat hkrum ai re lam chye lu ai.
