Mugawng mare hta hka kaba wa

Mugawng mare hta September shata 29 ya jahkawt hkying 3:00am aten daram kaw nna, Mugawng hka kaba rawt wa ai lam na chye lu ai.

Ya na zawn hka kaba wa ai lam hte seng nna, Mugawng mare na, Salang Lahpai Gum San Li tsun ai hta “Ya hte tup hka hku de marang htu ai majaw kaba wa ai re. Hka makau kaw nga ai nta htinggaw ni hpe grau nna hka kaba wa yang hprawng yen na matu lawk salang ni hku nna tsun ndau da ai lam ni nga sai. Anhte Mugawng ga gaw N-nyeng hka kaba wa na hpe grau hkrit ra dik htum re” nga nna tsun ai.

Hka kaba wa ai majaw, mare masha nkau mi hpe Mugawng hkye mawoi hpung ni hku nna, Hpung Kyi jawng hkan gan shanga tawn ai. Mare masha ni hta hkra machyi ai lam nnga ai hpe salang wa matut tsun ai.

Ndai zawn hka kaba wa ai lam gaw Mugawng mare hta marang htu ai lam nnga ai raitim, Mugawng hka hku de marang htu jang hka kaba wa ai rai nna, ya aten du hkra hka yawm wa ai lam nnga shi ai re.

Lai wa sai shaning hkan, hka kaba wa ai majaw, mare masha nkau mi a hkauna pa kaw hka lim mat nna, mam ni nlu dan shu la mat ai hte sum machyi mat ai lam law law nga lai wa sai hpe mung chye lu ai.

Photo, Fb