Mung Gu mare na Hpung Sara yan hpe Muse Hkyuk kaw sagawn mu
Mung Gu mare na Hkalup Hpung a Hpung Ningbaw Hpt.Dumdaw Nawng Lat hte Ramma Ningbaw Sara Langjaw Gam Seng yan hpe January, 24 ya shani Muse hkyuk kaw sagawn
mu la ai lam chye lu ai.
Dai ni January, 25 ya shani hta mung Mung Mau Ginwang na Hpung magam gun ni, Mung Gu buga hpung woi ni hte nta masha ni, sa du hkrum shaga lu ai lam hpe na chye lu ai.
Sara yan mat ai shata mi daram na ai hpang she January, 19 ya shani Myen hpyen dap ni rim zing da ai re lam ndau ai hta, Sara yan gaw daphpawm hpyen hpung ni hte matut mahkai galaw ai. Myen hpyen dap a shamu shamawt ai shiga hpe jaw ya ai majaw, Pukma 17 hte mara shagun nna, rim zing da ai re lam tsun da ai hpe chye lu ai.
Ndai Sara yan hpe lawan sawk sagawn hparan ya na matu KBC Ginajaw kaw nna, January 9 ya shani Myen Mung Asuya hkringmang rung, Myen Mung Gumsan magam, Myen mung hpaji jaw Salang Myen Hpyen Dap makawp maga hkingmang rung, ျပည္သူ႔လႊတ္ေတာ္, အမ်ဳိးသားလႊတ္ေတာ္ Jinghpaw Mung Asuya, Sam Mung Asuya, M.P.Hk Hpyen Dap hte Myen Mung Hkalup Hkristan Ginjaw MBC de laika tang shale shawn da ai lam nga lai wa sai re hpe mung chye lu ai.
Sara yan gaw Mung Gu mare KBC nawku hpung a magam gun rai nhtawm, lai wa sai December 24 ya shani Mung Gu ဗ်ဴဟာကုန္း hta rim tawn ai mare masha marai langai hpe sa hkam shaw la na matu, sa ai kaw Myen hpyen ni rim woi da ai re hpe chye lu ai.
Bai, Mung Gu mare masha ni hte Nawku hpung ni kawn mung Sara yan gaw hpyen bungli hte hpa n seng ai Nawku hpung a magam bungli hta kangka let gun hpai nga ai magam gun yan she re nga nna, sakse hkam tsun da ai lam hpe mung chye lu ai.
