Nmau Ginwang Ginjaw Tingnyang Up kawn, mungshawa ni hte hkrum zup hpawng galaw

Nmau Ginwang Ginjaw Div Komiti Tingnyang Up kaw nna, Nmau Ginwang Ginjaw kata hpyen yen nga ai mungshawa ni hte hkrum zup hpawng galaw la lu sai lam chye lu ai.

October shata 21 ya jahpawt hkying 9:00am aten kaw nna, Man Wing Htunghkying Wang Gawknu kaw, Nmau Ginwang Ginjaw Div Komiti Tingnyang Up hte Nmau Ginwang Ginjaw kata hpyen yen nga ai mungshawa ni hte hkrum zup hpawng galaw la lu sai lam, ginra masha langai tsun ai.

Zuphpawng galaw ai lam hta Nmau Ginwang Ginjaw Tingnyang Up Salang Kaba Nhkum Zau Gun kaw nna, hpyen yen mungshawa ni hpe shatsam n-gun jaw ga tsun ai hta

“Nmau Ginwang Ginjaw kata wa mai ai mare buga kahtawng ni tinang na mare buga de wa shaga, tinang mare buga kahtawng hpe bai wa gaw gap la saga” nga nna tsun ai lam, ginra masha matut tsun ai.

Nmau Ginwang Ginjaw kata hpyen yen nga ai buga mare kahtawng (50) jan nga ai hta na Hka Hkye, Lagat Saw, Chyau Hpya, Baw Noi, Kai Htik, Zaw Bung, Pung Ling, Nam Hka, Gawk Ngu Yang, Bang Gaw, Kahtan Kawng, Balawng Dingsa, Hka Shang, Hka Chyang Hku, Maji Gung, U Lang Pa, Prang Hkyem, Ta Maw Kawng Ra, Hku Bung, Kashawt, Wa Lu Pa, Mung King, Hkyim Puk, Hpa Pra, Prang Lwi, Gyu Sai, Kung Hka Pa, Hpaga Rai, Mung Lu, Je Sawn, Laika, Zup Ja, Maji Gung kaji, Loi Hkam hte Nam Lim Pa mare kahtawng hkan na hpyen yen mungshawa ni gaw, tinang buga mare kahtawng de mai wa nga sai lam chye lu ai.

Dai ni na zup hpawng hta Nmau Ginwang Ginjaw kata na salang ni hte hpyen yen mungshawa marai 200 daram sa du shang lawm ai hte galaw la lu sai lam chye lu ai.