Mung Myit Sinli Ga ( Kachin Sub-State ) ginra hta gasat gala majan matut manoi byin nga

Lahta Sammung, Mung Myit Sinli Ga ( Kachin Sub-State ) ginra kata dai ni November 22 ya shani hta mung gasat gala majan laja lana matut byin nga ai lam chye lu ai.

Dai ni November, 22 ya jahpawt hkying 6:10am aten hta KIA Dap Ba ( 4 ) Dap Dung ( 9 ) de htu lung wa ai Myen hpyen hpung ni hte KIA hpyen hpung ni Nam Um hte Mung Baw hka mahkrai lapran kaw laja lana gasat gala byin ai lam,

dai hpang Sinli hte Kutkai lapran na Man Ping kawng kaw mung shani hkying 12:20am aten, Lashu de na lung wa ai Myen hpyen modo ( 5 ) hpe KIA hte hpu nau rawt malan pawng hpawm hpyen hpung ni hkap shingla gasat ai lam chye lu ai.

Matut nna Mung Gu ginra na Myen hpyen dap Byuha Kawng hta mung gasat gala laja lana byin ai lam, dai gasat gala byin ai shara de Myen hpyen dap ni Jet nbungli hte mung wa gap gasat ai lam chye lu ai.

Jinghpaw mung kata hta mung November, 21 ya shani, KIA Dap Ba ( 3 ) Dap Dung ( 27 ) ginra, Gok Ngu yang kaw Myen hpyen dap Hk.M.Y ( 602 ) ni hte KIA hpyen hpung ni shana hkying 8:00pm aten hta gasat gala majan byin ai lam chye lu ai.

November, 22 ya shani hta mung KIA Dap Ba ( 2 ) Dap Dung ( 6 ) ginra, Gawlu Yang hte Hkrai Rung ( တံတားညီေနာင္ ) lapran kaw jahpawt hkying 9:30am aten hta gasat gala majan byin ai lam chye lu ai.

Matut nna KIA Dap Ba ( 5 ) Dap Dung ( 3 ) ginra, Gara Yang hte Awng Ja lapran Gase hka makau kaw mung gasat gala majan byin ai lam chye lu ai.