Mungchying Uphkang Dap, DGA rung hpaw ai (50) ning hpring masat hpawng lamang galaw
Wunpawng Mungdan Shanglawt Asuya, Mungching Uphkang Dap DGA rung hpaw ai (50) ning hpring masat hpawng lamang hpe November shata 14 ya jahpawt hkying 8:00am aten hta Laiza Muklum, Sinpraw Majoi Gawknu kaw galaw ai lam chye lu ai.
Rev Chyang Maja Tu Shan kaw nna hpawng hpaw akyu hpyi ya ai, dai hpang Bau manga shi lang dum ai lam galaw ai. Salang Kaba Maji Naw Mai (C-Div.O/ Poi shabyin shatai komiti ningbaw) kaw nna hpawng hpaw mungga shaga ai.
Salang Kaba Lama Gum Hpan ( Shawnglam Mungmasa Jasat Hpung, SMJH Ningbaw ) kaw nna Mungchying Uphkang Dap, DGA hpe hpaw hpang wa ai shingdu labau tsun ai hta “N nga ai kaw na nga ai de, N gun kaji ai kaw nna, N gun kaba ai de, Wunpawng Mungchying Uphkang Dap hpe n gun kaji ai kaw nna kaba ai de gaw gap maden jat sa wa na ngu ai polisi hte masing ni hpe masat jahkrat nna galaw sa wa ai rai nga ai” nga nna ra mara lam ni hpe hpaji jaw mungga tsun ai.
Mungchying Uphkang Dap kaw nna, DGA Lithkam Magam Gun lai wa sai Magam Gun Usa ni rai nga ai Salang Kaba Lanyaw Zawng Hra, Du Kaba Lamung Tu Jai, Salang Kaba Lajawng Hkawng Lum ni hpe masat dazik hte magun lit ni hpe shagrau ai lam galaw ai. DGA labau hpe ka lajang ya ai Salang Kaba Lama Gum Hpan (SMJH Ningbaw), hpe chyeju dum magun lit hte shagrau sha a ai lam galaw ai.
Wunpawng Mungbawng Rapdaw (WMR), Wunpawng Htunghking Hpung Ginjaw(WHG), Lawngwaw Htunghking Hpung, Lachik Htunghking Hpung, Zaiwa Htunghking Hpung, Rawang Htunghking Hpung, Lisu Htunghking Hpung, Nungmyi Htunghking Hpung, Jinghpaw Htunghking Hpung, Sam Htunghking Hpung ni hpe mung magun lit hte Bau ni hpe jaw ai lam galaw ai.
Ndai hpawng lamang hta laksan hku nna saw shaga da ai manam ni gaw, Myitkyina WMR, WHG, Nawku makam hpung ni, Wunpawng Amyu bawsang ni, Hpyen yen dabang shagu kanu kawa ni, Laiza Muklum mungshawa ni, Ginwang shagu na komiti gawng malai ni hte Sam hpu nau ni du sa ai rai nna, magun lit yawng (45) du ai, masha n gun yawng marai 1600 daram du ai re lam, poi shabyin shatai komiti amu madu Salang Kaba Sabaw La Zau tsun ai.
Shana hking 6:30pm aten kaw nna mahkawn ka hkrang shingjawng ai lamang nga ai. November shata 15 ya jahpawt hking 9:00am aten hta Alen Bum Hpungwa Gawknu kaw DGA rung hpaw ai 50 ning hpring chyeju shakawn wunli la akyu hpyi hpawng matut galaw sa wa na re.
Mungchying Uphkang Dap, DGA rung hpe lai wa sai 1969 ning June, July shata laman hpawng ai Ginjaw zuphpawng hta Mungchying Uphkang Dap DGA rung hpe hpaw shabawn dat sai rai nna, dai ning 2019 shaning hta gaw 50 ning hpring sai re lam chye lu ai.
