Mungdan Hkamja Dap kaw nna magam dap ni hte hpyen yen dabang ni hta hkali ana jep chyoi ya

Wunpawng Mungdan Shanglawt Asuya, Mungdan Hkamja Dap kaw nna Laiza Muklum kata shanu nga ai hpyen yen dabang shagu hte magam dap magam gun masha ni hpe January shata praw kaw nna hkali ana jep chyoi ya nga ai lam chye lu ai.

Hkali ana jep chyoi ya ai lam gaw, Muklum kata shanu nga ai hpyen yen mungshawa ni hte dap shawa masha ni yawng hkali ana hpe tau nau makawp maga lu na matu hte hkali ana rawng nga ai mungchying mungshawa ni hpe makawp maga tsi jaw lu na matu madung yaw shada ai let galaw ai re lam chye lu ai.

“Mungdan Hkamja Dap kaw nna lit la let hkali ana makawp maga ai lam hpe tau nau galaw lu na matu, hkali ana jep chyoi ai lam galaw nga ai hta, Muklum kata shanu nga ai mungchying mungshawa ni, magam gun dap shawa masha ni yawng mung, hkali ana hpe nhprai ai sha jep chyoi hkam la nhtawm, hkamja lam hpe hkan nang hkan sa nga ga” nga nna Sara Wun Dahki Dam Yaw Bi tsun ai.

Hkali ana jep chyoi ai lam hpe laiwa sai 2021 ning January shata praw 7 ya shani kaw nna hpang nhtawm, Mai Sak Pa, Lamai Yang, Mung Lai Hkyet, Woi Chyai hpyen yen dabang, Je Yang hpyen yen dabang, Jawngma Dap, Shiga Magam Dap hte Laiza lawk (5) ni hta jep chyoi ai lam galaw la lu sai rai nna, hkali ana jep mu lu ai masha marai 8 nga sai lam chye lu ai.

Ngam nga ai magam dap hte hpaji jawng ni hta mung, hkali ana jep chyoi ai lam matut galaw sa wa na rai nna, ya na zawn magam dap, makan dap shagu hte hpyen yen dabang shagu de hkali ana jep chyoi ai lam hpe laiwa sai 2019 ning kaw nna galaw hpang wa ai re lam chye lu ai.