Munggu Byuha kaw gasat gala majan byin ai majaw, mungshawa htinggaw (100) jan hpyen koi yen hkrum
Mungmyit Sinli Ga (Kachin Sub-state) ginra, Munggu Byuha kaw Otober shata (12) ya shani hkying 10:40am aten Gumshem Myen hpyen dap hte Kokang MNDAA hpyen hpung ni gasat gala majan byin ai majaw, dai mayan shanu nga ai mungshawa htinggaw (100) jan gaw, hkrit tsang nna jarit mayan de hprawng koi yen nga ai lam chye lu ai.
Kokang MNDAA hpyen hpung ni gaw, Gumshem Myen hpyen dap, Munggu Byuha hpe mare maga hku nna sa htim gap ai, Gumshem Myen hpyen dap kawn mung, laknak kaji kaba hte bai nhtang gap bun ai majaw, dai mayan shanu nga ai mung mare masha marai (6) sinat si hkra hkala hkrum ai hta, asak (2, 3) ning re ai Ma kasha (2) mung lawm ai sha n-ga, mungshawa ni hkrit tsang nna hprawng koi yen nga ai lam, dai ginra na salang langai tsun ai.
Ya aten hkyak hkyak hpyen koi yen hkrum nga ai mare ni gaw, Hpau Jung Pa mare, Hpau Jung Pa mare nnan hte Kawng Tap mare ni rai nna, htinggaw (100) jan daram re lam matut chye lu ai.
Hpawng Seng hkran, Man Yang hte Bang Mwi mare kaw na hpyen yen mungshawa ni hpe gaw, Gumshem Myen hpyen dap kawn October praw (5) ya shani kaw nna tinang dum n-ta de bai nhtang wa na matu tsun ai majaw, hpyen yen ni mare dum n-ta de bai nhtang wa sai lam, na chye lu ai.
October shata (12) ya shani hta sha, hkying 9:25am aten kaw nna Man Mau makau hte Bang Tawng Bum kaw Gumshem Myen hpyen hpyen ni htu shadut lung wa ai majaw, Kokang MNDAA ni hte gasat gala majan byin ai rai nna, Gumshem Myen hpyen dap ni gaw, Law Ja Chyai mare kaw na mungshawa ni hpe adup zingri jahkrit shama wa galaw ai re lam, ginra masha ni kaw na chye lu ai.
