Munggu Pyi Tu Tsit ( P.T.Ts ) ningbaw kawn mare Salang hte Htunghking Salang ni hpe zuphpawng woi galaw
Mungmyit Sinli Ga ( Kachin Sub-State ) KIA Dap Ba ( 6 ) Dap Dung ( 36 ) ginra, Munggu Ginwang Man Jak Ninghtawng, Munggu mare Miwa Htunghking rung kaw September 26 ya shani hkying 11:00am aten hta Munggu Pyi Tu Tsit ( P.T.Ts ) ningbaw Htang Si woi awn nna mare Salang ni hte Htunghking Salang ni hpe nanghpam pat jasan hte seng nna zuphpawng woi galaw ai lam, zuphpawng sa lawm ai Salang langai shana wa ai.
Munggu ginra hta ka-ni hkyi ya, lagut damya masha grai law wa ai majaw, P.T.Ts ningbaw Htang Si gaw, Munggu Byuha Mu hpe gara hku di na ngu sa bawng yang, Byuha Mu gaw anhte gaw hpyenla she re majaw nrau ai, Mungmasha hte jahkrup nna galaw mu ngu hkap tsun ai majaw, P.T.Ts ningbaw Htang Si kawn mare uphkang Salang ni, Wunpawng Htunghking Salang ni hte Miwa Htunghking Salang ni hpe shaga la nna woi hpawng ai lam, Salang wa tsun ai.
Lai wa sai ten hta mung ka-ni lu sha, dut mari ai masha ni hpe rim la nna hpang kalang bai n-galaw na matu ga sadi ta masat htu shangun ai, nkau hpe gaw rim ahkyak la da ai rai yang, nkau mi gaw Salang ni wa hkam shaw ai, bai nkau gaw gumhpraw hte wa shaw mat ai, dai majaw awngdang ai lam nnga ai, ndai lang gaw kadai mung nhkam shaw ai sha, lusha ai wa mung, dut ai wa mung, Miwa Mung de wa dawn la na hku jawm myit hkrum bawngban da ai lam, Salang wa matut tsun ai.
Ndai bawngban da ai lam byin lu na matu, zuphpawng hpe kalang naw hpawng nna dai shani she Komiti hpaw nhtawm, ta tut bungli galaw sa wa na re lam chye lu ai.
