Munghkawng mare gat makau kaw dum nta hte gat seng ni wan hkru mat

Manmaw Muklum kaw nna, deng hkun jan daram tsan ai, Munghkawng mare gat makau kaw November shata 16 ya shana maga hkying 1:30pm aten daram hta hpun pyen nta kaba 2 hte gat seng nta 9 yawng 11 wan hkru sum mat ai lam chye lu ai.

“Wan hkru wa ai mabyin gaw, gat seng shingdu kaw myihprap wan kaw shat shadu da ai kaw na hkru hpang wa ai re, lamu nmung yang gaw mare ting ngu na hkru mat ai baw re lam” Munghkawng mare masha langai tsun dan ai.

Wan hkru sum mat ai nta ni gaw, Rev. Hka Awng (Nam Lim Pa, Hpung Up), hpun pyen nta kaba, Slg. Maran Zau Ring ni a hpun pyen nta kaba rai nna, gat seng nta gaw, Slg. Dauje Tu, Slg. Seng Bawk, Slg. Damau La Ja, Gala Seng, Ma Tawng, Slg. Naw Tawng hte Pu Li ni a gat seng ni re.

Dum nta na arung arai hte gat seng na arung arai gaw hpa mung nlu la mat ai masha gaw hpa nra ai, Munghkawng kaw wan sat modo gaw nga ai raitim, gawt na masha nnga ai kun hten ai mahtang kun sa wa ai nnga ai, wan hkru ngut ai hpang gaw, Manje de na wan sat modo langai gaw du lung wa ai, wan n-ga ni naw grung nga ai ni hpe wa sat ya ai, nga nna Munghkawng mare masha ni kaw na chye lu ai.

Gat seng kaw bang da ai gun rai ni gaw, bu hpun palawng, malu masha hpan hkum, tsi ni rai nna, hkru sum mat ai hpun pyen nta hte arung arai manu ntsa lam sawn maram yang, sen hkying mi jan daram sum machyi mat ai rai nna, Wan hkru hpang wa ai dum nta masha ni hpe lit nga ai salang ni san jep nga ai lam chye lu ai.

Munghkawng mare kaw lai wa sai aten hta ndai zawn wan hkru kaba tsin yam nnga ga ai rai nna, wan sumri ni hkru di mat ai majaw, ya aten myi hprap wan hte shadu lu/sha ai mungshawa ni yak hkak hkrum nga ai lam chye lu ai.