Munghpawm Myanmar Mungdan kata na Rudi amyusha yawng tara rap ra ai simsa lam hpe rau jawm gawgap wa lu na matu WMR kawn ndau laika shapraw
Mungkan Simsa lam masat ninghtoi rai nga ai September shata 21 ya shani hta Munghpawm Myanmar Mungdan kata na Rudi amyusha yawng shada chye na hkungga hkat nna, tara rap ra ai simsa lam hpe rau jawm gawgap sa wa ra na lam Wunpawng Amyusha Mungbawng Rapdaw (WMR) kawn tsun shadut ndau laika shapraw da ai hpe mu chye lu ai.
Mungkan Simsa Lam masat ninghtoi hpe UN kaw nna 1981 ning September shata 21 ya shani myit hkrum dawdan masat da ai rai nna, ndai masat nhtoi hpe mahta nna, Myen Mungdan kata hta mung simsa lam hpe ma ja galaw lam nre sha, tara shang lawan byin wa na matu shada bawngban hkat nna teng man ai simsa lam hpe lu la wa na matu yaw shada ai lam, Wunpawng Amyusha Mungbawng Rapdaw (WMR) Ningbaw Sara Lashi La tsun ai.
“Simsa lam hpe tara shang lawan byin wa na hku, ma ja galaw ai lam nre sha shada bawngban hkat nna, tengman ai simsa lam hpe galaw dat ai hte Mungkan kaw mung lu garum na re ngu yaw shada ai, Myen Mung Asuya, Myen Hpyen Dap hku nna galaw taw nga ai gaw shut ai, Mungkan a man hta nhtuk ai ngu chye na shangun mayu ai majaw, mungshawa ni yawng mung ndai Massage lu la mu ga ngu shana shabra dat ai rai ga ai” nga nna tsun ai.
UN kawn 2020 ning March shata 23 ya shani kaw nna COVID-19 ana zinli gaw Mungkan ting a hpyen langai re majaw, yawng jawm ninghkap gasat ra na lam ndau da ai re sha n-ga, Mungkan Mungdan kata byin nga ai gasat poi manghkang ni jahkring nhtawm, simsa lam hpe yawng jawm bawngban na matu shadut da ai lam nga ai raitim, Myen Mungdan kata hta gasat gala manghkang ni jahkring na lam hpe tatut hkrang n shapraw lu ai re.
Shaning (70) daram byin lai wa sai Myen Mung dinghku majan hpe ginchyum dat ging sai majaw, laknak lang rawt malan wuhpung wuhpawng ni, Myen Asuya hte Myen Hpyen Dap a lapran shada chye na hkat nna simsa lam hpe rau jawm gawgap na matu ahkyak nga sai lam, Mungdan dinghku majan a majaw tinang mare buga dum nta hpe tawn kau da nna, hpyen koi yen ra mat ai (IDPs) ni hpe mung dum nta de bai wa lu na matu myit hpraw san seng ai hte galaw yang sha, myit makam lu la nna tinang mare buga de ngwi pyaw simsa ai hte wa lu na re lam ndau laika hta ka da ai re.
Myanmar Munghpawm Mungdan kata na Rudi amyusha yawng shada nbung hkat ai lam ni nga ai raitim, shada chye na hkungga let, jet ai simsa lam hte tara rap ra ai simsa lam hpe rau jawm gawgap sa wa ra na lam Wunpawng Amyusha Mungbawng Rapdaw (WMR) kawn ndau laika shapraw da ai kaw na chye lu ai.
Photo Credit; WMR
