Mungkan AIDS masat N’htoi madi shadaw, Marathon kagat shingjawng lamang galaw
Laiza Muklum Ramma Komiti kawn woi awn ai hte Mungkan AIDS masat n’htoi hpe madi shadaw ai hku nna December, 1 ya jahpawt hkying 5:00am aten kaw Marathon kagat shing jawng lamang galaw ai lam
chye lu ai.
2011 ning shawng daw hta December hkap tau ai lamang hte Marathon kagat shing jawng ai lamang hpe shaning shagu galaw nga ding yang rai tim majan byin wa ai ten kaw na nlu galaw mat ai ( 5 ) ning ram na mat sai lam, 2016 ning hta she bai lu galaw ai re hpe mung chye lu ai.
Hpyen yen ramma ni hte Laiza muklum ramma ni hkamja zet let ai hte lam shagu hta bawng ring rawt jat wa na matu yaw shada let ya zawn shing jawng lamang hpe woi galaw ai lam chye lu ai.
Mungkan AIDS masat n’htoi gaw 2016 ning du hkra rai yang ( 28 ) ladu hkrum sai re lam, 1988 ning December, 1 ya shani Mungkan Hkamja Dap WHO kawn mungkan ting HIV, AIDS ana hte seng nna dum hprang nga lu na matu yaw shada let woi galaw hpang wa ai re lam mung chye lu ai.
Marathon kagat shing jawng ai hta La hte Num masat pandung garan da ya ai hta La kasha ni Hpumlum Yang mare Alen Bum IDP jawng kaw du hkra gat nhtang gat wa ra ai rai nna Num kasha ni Je Yang mare kaw na bai nhtang gat wa ai hta La kasha maga na Sinda masat ( 139 ) Shd.Hpaugun Tu Hkum No, 1 du shagn nhtawm Num kasha maga na Sinda masat ( 143 ) Shy. Marip Seng Mun No, 1 du shang ai re lam chye lu ai.
Kagat shing jawng ai kaw Alen Bum Jawngma, Hpyedu Jawngma, National Service ( Myu Sha Rap Raw ) hte Mungkan ramma ni yawng marai ( 300 ) jan gat shing jawng ai hpe mung chye lu ai.
Mungkan AIDS masat n’htoi lamang hpe jahpawt hkying 9:00am aten kaw bai matut galaw ai hta Ginjaw Hkamja Dap na Dujum Maran Naw San kawn AIDS hte seng ai mungga hti ndau ai rai nna, Ana byin nga ai machyi masha amyu shayi langai kaw nna mung sakse hkam ga tsun shaga ai lam galaw ai hpe chye lu ai.
