Mungkan Amyu shayi masat n’htoi hte magam gun jan ni a hkrum zup hpawng lamang galaw

Laiza Muklum amyu shani komiti kaw nna woi awn ai Mungkan amyu shayi masat n’htoi hte magam gun jan ni a hkrum zup hpawng hpe March shata praw 8 ya jahpawt hkying 10:30am aten Laiza muklum, Na Zaret zinlawng hta galaw ai.

Hpawng hta Wunpawng Mungdan Shanglawt Amyu shayi hpung ginjaw Komiti Ningbaw Hpawmi Nangzing Kaw Hpang kaw nna, magam gun jan, amyu shayi ni hpe n gun jaw shatsam mungga shaga ai hta

“Mungkan hta num law law nga ai hta na dai ni nang ngai hpe lata da sai majaw dinghku hpe ngang ngang kang kang woi awn ra ai, madu wa galaw nga ai magam bungli gaw tinang a lit re majaw tinang lit la lawm ra ai hpadi hpadaw tai ra ai, shari shadang hpring hpring hte anhte a dinghku hpe makawp maga nga ga, daini na aten hta anhte ni ganing re du hkra ladaw hta nga taw nga ai hpe sum ru shangun mayu ai” nga nna tsun ai.

Laksan Laiza Muklum Amyu shayi ningbaw hpawmi Marip Kai Htang kaw nna mung hpawng galaw ai a yaw shada lam hpe tsun ai hta “Magam gun jan ni n ga kanu num ni kadai mung kade dunghku nga nna jahkrat da ai shaloi gaw grai pyaw ai ni mung nga ai, grai yak ai ni mung nga ai, yu yang gaw grai pyaw tim mung tinang na hkum tinang npyaw ai ni grai nga ai, nta kaw kade mi npyaw yang npyaw u ga dai ni na zawn re kaw shada myi man hkrum rai shada n gun jawm kahkyin la rai hkrum zup ai lam hpe madung dat shangun mayu ai lam re” nga nna tsun ai.

Hkrum zup hpawng galaw ai hta du sa wa ai amyu shayi yawng marai 160 jan rai nna, hta hkrup ga tsun shingjawng ginsup lamang ni hpe mung woi ginsup ai hta n ga mungkan amyu shayi masat ninghtoi hpawng hpe shaning shagu galaw ai lam chye lu ai.