Mungkan amyu shayi mazut roirip ninghkap masat ninghtoi galaw
Oplus_131072
Laiza Muklum amyu shayi komiti hte Htoi Gender and Development Foundation kaw nna woi awn let, Mungkan amyu shayi mazut roirip ninghkap masat ninghtoi hpe November shata 25 ya shani Laiza Muklum kaw galaw ai lam chye lu ai.
Hpawng lamang a yaw shada lam hpe Jan. Marip Kai Htang (Laiza Muklum Amyu Shayi Komiti Ningbaw) kaw nna tsun ai hta
“Amyu shayi ni a ntsa lam amyu myu hku nna mazut roirip ai ngu ai gaw Num, La ganawn mazut roirip ai sha nre, tsun shaga hkrang shala ai hku na, magam bungli galaw ai lam amyu myu hku na shagrit ai, grau kaja hkrak ai magam bungli n shangun ai njaw ai, dai zawn re kaw na hkawt anhte hpe shagrit da ai lam hpe galaw ai gaw, anhte amyu shayi ni hpe maga mi hku nna mazut roirip ai lam mung re, ndai zawn re lam ni hpe ninghkap ai hku na galaw ai lam re” nga nna tsun ai.
Laiwa laisa mungshawa ni hpe amyu shayi mazut roirip ninghkap masat ninghtoi byin pru wa ai labau laika pa garan ya ai lam, masat sumri shakap ya ai lam, amyu shayi ni a ntsa mazut roirip ai lam ni hpe ninghkap ai hte seng ai lawnglam ni hpe Laiza Muklum shinggrup let, tsun sang lang ai lam galaw ai re.
Masat ninghtoi hpe Laiza Muklum kata na amyu shayi ni, makau grup yin mare kahtawng, hpyen yen dabang hkan na ramma, jawngma ni shanglawm ai hte galaw la lu sai re lam chye lu ai.
