Mungkan Hkashi Hkanu Masat Ninghtoi lamang galaw

Mungkan Hkashi Hkanu masat ninghtoi hpawng lamang hpe March shata 14 ya jahpawt hkying 7:00am aten, Laiza Muklum, Zup Awng gawdin pa kaw galaw la lu sai re.

Ndai hpawng hpe Laiza Muklum kata shabyin shatai komiti hpaw nhtawm, ra ai lang rung lang rai malu masha ni hpe Htoi Gender ni garum la rai nna, Laiza hka, Munglai hka, Hkaya hka hte Hkachyang hka ni kaw maza hkan hta ai lam ni hpe galaw nga ai re.

Hpawng a yaw shada lam hpe Saranum Kaba Nbau Nang Pu (Htoi Gender Director) tsun ai hta “Mungkan kaw nga ai hkashi hkanu ni hpe san tsawm hkra, wanglu wanglang lwi hkrat wa lu na matu re, mungkan kaw nga ai hkashi hkanu ni nsan tsawm wa yang hka hpe machyu nga ai shinggyim masha ni hta amyu myu mayak manghkang ni byin wa ai, maza hpe asan rai dai ni hta ngut na lahkawng ya dang sha san na hku nre ai sha, maza hpe hka de bai n gabai na matu, arawn alai ni hpe galai shai wa na matu yaw shada ai re” nga tsun ai.

Matut nna shatsam mungga hpe Rev. Zinghang Gam Htun tsun ai hta “Anhte gabai dat ai maza mala ni a majaw, du sat du myeng ni si wa ai re, shanhte gaw ga nchye shaga ai myit sawn sumru chye ai anhte shinggyim masha ni makawp maga hkang zing ra ai, hka a lam hpe manaw manang, nta masha ni hpe ndai lam ni hpe tsun dan ra ai” nga tsun ai.

Mungkan hkashi hkanu masat ninghtoi hta Muklum kata nga ai mare lawk shagu na mungshawa ni, Magam Dap, Makan Dap na magam gun ni sa du shang lawm let, shara garan maza hkan hta ai lam galaw ai re.

Mungkan hkashi hkanu masat ninghtoi gaw lai wa sai 1997 ning March shata hta Brazil mungdan kaw na byin wa ai rai nna, dai ning gaw 26 lang na mungkan hkashi hkanu masat ninghtoi re lam chye lu ai.