Mungkan ka-ni nanghpam ninghkap masat ninghtoi hpawng galaw
KIA Masat (9) Dap Ba, Uru Ginwang Ginjaw pat jasan komiti kaw nna woi awn let, mungkan ka-ni nanghpam ninghkap masat ninghtoi hpawng lamang hpe June shata 26 ya jahpawt hkying 7:00 aten hta Uru Ginwang Ginjaw kata hta galaw la lu sai lam chye lu ai.
Daining na ka-ni nanghpam ninghkap masat mungga hpe Uru Ginwang Ginjaw Komiti Tingnyang Up, Du Up Jum Lajai Ze Hkawng kawn hti shalai ya ai lam galaw ai hpang, Uru Ginwang Ginjaw pat jasan komiti ni kaw nna, 2023-2024 ning laman rim zing la lu ai ka-ni nanghpam ni hpe wan nat jahten ai lam galaw ai hpe lit nga ai salang langai tsun ai.
Ka-ni hpraw sapbya kawk 385, ဇီးပြာ:ဘူး 140, Yama tawng 5500, ka-ni chyang htuk kaji 3 ni hpe wan nat jahten kau ai lam galaw ai rai nna, ka-ni madu ni hpe gaw tara upadi hte hkrak, seng ang ai salang ni kawn lit la hparan mat wa na re lam, salang wa matut tsun ai.
Matut nna KIA Masat (3) Dap Ba ginra Loi Je Muklum kata hta mung, ka-ni nanghpam ninghkap masat ninghtoi hpawng lamang hte seng nna, ginra mungshawa ni shawa n-gun madun ai lam galaw ai hpe chye lu ai.
Shawa n-gun madun ai hta ka-ni nanghpam gaw amyusha yawng a hpyen madung re, atsai awai gasat shamyit kau ga, ka-ni nanghpam hkoi san ai mare kaba byin tai hkra yawng jawm shakut ga, ka-ni nanghpam dut mari hpaga galaw ai ni hpe ninghkap ga nga nna, lam hkawm marawn ndau ai lam galaw ai hpe chye lu ai.
