Mungkan Ka-Ni nanghpam ninghkap masat ninghtoi lamang galaw

Ninggawn Daju Ka-Ni Nanghpam Pat Jasan Komiti ni woi awn nhtawm, Mungkan Ka-Ni nanghpam ninghkap masat ninghtoi lamang hpe June shata 26 ya jahpawt hkying 8:00am aten hta Laiza Muklum mare ka-ang kaw galaw ai lam chye lu ai.

Hpawng lamang hta nawku hpung woi sara ni akyu hpyi ya ai. Du Up Jum, Lahpai Hing Wawm ( Ninggawn Daju Ka-Ni Nanghpam Pat Jasan Komiti Ningbaw ) hpawng hpaw mungga tsun ai hta Mungkan Ka-ni nanghpam ninghkap masat ninghtoi hpawng hta sa du ai mungchying mungshawa hte magam gun ni yawng hpe chyeju dum ai lam, dai ning 2019 ning a Mungkan United Nations Office on Drugs and Crime (UNODC) kaw nna shapraw da ai ga baw gaw, Hkamja lam hte tara rap ra lam ngu ai hpe madung da nna galaw sa wa ai re lam tsun ai.

Matut nna Du Up Jum, Nhpang Naw Bu ( Ginjaw Ka-Ni Nanghpam Pat Jasan Komiti Salang, Wunpawng Amyusha Ka-Ni Nanghpam Pat Jasan Masing Jum Hpajang Komiti Amu Madu ) hku nna mung, KIO Pat Jasan Komiti kaw nna Mungkan de ndau ai sumtang laika shapraw da lu sai hte yaw shada lam hpe tsun ai.

“Sumtang laika a yaw shada lam gaw nambat (1) Wunpawng Mungdan hte lahta Sammung, Kachin Sub-state kaw e, ka-ni nanghpam hkai ai, galaw shapraw ai, dut ginlen ai ndai a, ru pawt hpe tam na matu re. (2) ngu na gaw dai ka-ni nanghpam manghkang hpe tengman ai ladat hte gara hku gasat shamyit kau na ngu ai mahkrun kaja hpe tam na matu, mu na matu ndai report hpe ka ai lam rai mali ai” nga nna tsun ai.

Mungkan ka-ni nanghpam ninghkap masat ninghtoi hpawng de sa ai Mungshawa ni hte magam dap, magam gun ni pyendau hpai nna shawa nsen ( Slogan ) marawn ai hta (1) Mungkan ka-ni nanghpam ninghkap ninghtoi. ( Dum nga ga ), (2) Ka-ni nanghpam hpyen gaw Amyusha hpyen madung re. ( Gasat shamyit kau na ), (3) Ka-ni nanghpam hpyen gaw Mungdan a hpyen re. ( Gasat shamyit kau na ), (4) Ka-ni nanghpam hpyen gaw dinghku a hpyen re. ( Gasat shamyit kau na ) ngu ai ga si ni hpe marawn let lam hkawm n gun madun ai.

Wunpawng Mungdan Shanglawt Asuya kaw nna mung, ka-ni nanghpam hpe gasat shamyit ai lamang hku nna, lai wa sai April shata 25 ya shani hta D-Day lamang hpe galaw lai wa sai re. Dai ni gaw Mungkan Ka-Ni nanghpam ninghkap masat nhtoi hpe shawa masha hpe grau chye shangun mayu ai majaw ndai kalang gaw Myo mare ka-ang de masha grau law lai, grau law zup ai shara kaw nambat (1) lang galaw ai re. nga nna Ninggawn Daju Ka-Ni Nanghpam Pat Jasan Komiti Amu Madu Du Up, Lasaw Nga Bat tsun ai.

Hpawng lamang hta Mungshawa Kanu Kawa Ramma ni hte Magam Dap, Makan Dap na magam gun masha ni yawng marai 750 daram sa du shang lawm ai lam chye lu ai.

Mungkan ka-ni nanghpam masat ninghtoi hpe lai wa sai 1989 ning, June shata 26 ya shani hta masat dat ai rai nna 2019 ning, dai ni June shata 26 ya shani gaw 30 ning hpring ai masat ninghtoi mung rai nga ai.