Munglai Hkyet kaw COVID-19 ana kap hkrum ai marai (100) jan tsi tsi gawn lajang hkamla nga
Laiza ginra kata Munglai Hkyet tsi gawn lajang dabang kaw ya aten COVID-19 ana kap hkrum ai masha marai (113) tsi tsi gawn lajang hkamla nga ai lam, tsi gawn lajang dabang lit nga ai salang ni kaw na chye lu ai.
Tsi gawn lajang dabang hta, COVID-19 ana positive byin ai machyi masha ni hpe num/la garan nna, tsi tsi gawn lajang nga ai hta, grai machyi sawng wa ai ni hpe gaw, hkyak hkyak tsi gawn lajang shara (I.C.U ward) kaw htawt sit tsi gawn lajang nga ai lam, Sarawun Awng Gam tsun ai.
Tsi gawn lajang hkamla nga ai ni hta, asak (60) ning lahta marai (3) lawm ai rai nna, hkyak hkyak tsi gawn lajang shara (I.C.U ward) hta gaw, marai (2) tsi tsi gawn lajang hkamla nga ai lam chye lu ai.
Laiza ginra kata de shang wa ai Lamai Yang, Mai Sak Pa shara ni hta, ana jep mu lu ai masha law jat wa ai majaw, mungshawa ni COVID-19 ana makawp ninghkap tara ni hpe dinghkrai matut hkan sa na matu, Ginjaw COVID-19 Ana Zinli Makawp Ninghkap Komiti kaw na sadi jaw ndau da ai lam nga ai re.
Ya aten Laiza ginra kata ana jep tawn da ai masha marai (100) jan nga ai rai nna, Hkamja lam masam maram hkamla nga ai masha marai (293) nga ai hte COVID-19 ana makawp maga tsi nhtu shi ai ni mungshawa ni hpe mung, makawp maga tsi htu ya nga dingyang re lam chye lu ai.
