Munglai Hkyet kaw COVID-19 ana machyi masha marai 121 tsi gawn lajang hkamla nga
Laiza Muklum, Munglai Hkyet tsi gawn lajang dabang hta, October shata 20 ya shani du hkra rai yang, COVID-19 ana positive masha marai 121, tsi tsi gawn lajang hkamla nga ai lam chye lu ai.
Tsi gawn lajang hkamla nga ai positive masha ni mung, ana mai tsai wa magang sai rai nna, ana maram masam Quarantine hkamla nga ai masha gaw, marai 123 nga ai re lam, Munglai Hkyet tsi gawn lajang dabang lit nga ai salang ni kaw na chye lu ai.
October shata 19 ya shani hta Munglai Hkyet kaw COVID-19 ana positive masha marai 21 bai jep mu lu ai majaw, ya aten Munglai Hkyet mare hpe lockdown bai masat da sai re.
Bungli hte hkawm sa ai kadai raitim, Munglai Hkyet mare kata wa hkring ai lam, shang hkawm ai lam tsep kawp n galaw na matu hte Laiza Muklum kata shanu nga ai mungshawa yawng mung, COVID-19 ana zinli makawp ninghkap tara hpe nshut nshai hkan sa na matu, Ginjaw COVID-19 Ana Zinli Makawp Ninghkap Komiti kaw na sadi jaw ndau da ai lam nga ai re.
Ya aten Munglai Hkyet mare shang wa ai shara kaw hkamja lam jen jep gate masat nna, hkawm sa hkawm wa mungshawa ni hpe jep chyoi nga ai lam chye lu ai.
