Mungmasha langai hpe gumshem Myen hpyen ni rim woi mat ai nhtoi 20 ya raitim dat ya ai lam nnga ai majaw, nta masha ni myit tsang nga

Munghkawng mare na mungmasha langai hpe dap mying n chye ai gumshem Myen hpyen dap ni rim woi mat ai, ninghtoi 20 ya raitim dat ya ai lam nnga ai majaw, nta masha ni myit tsang nga ma ai lam, mare masha ni kaw na chye lu ai.

“Gumshem Myen hpyen ni rim woi hkrum ai mungmasha gaw, Munghkawng mare na Salang Labya Tawng La asak (30) ning daram rai sai kasha lahkawng lu ai. Shi gaw Han Htet mare kaw cycle sa gram nna nhtang wa ai kaw rim la hkrum ai re” nga nna mare masha langai shana wa ai.

March shata 13 ya shana maga hkying 6:00pm aten daram hta rim hkrum ai re. Mare salang ni hpe san sagawn shangun ai raitim, gara dap ni rim woi mat ai hpe ya du hkra n lu sagawn shi ai majaw, nta masha ni grai myit tsang nga ai lam, salang wa matut tsun ai.

Lai sai aten hta mung, Munghkawng mare na mungshawa ni hpe gumshem Myen hpyen dap ni mara kata rim woi mat nna, adup zingri san jep nhtawm, nkau hpe gaw bai dat ya ai nkau hpe gaw sat kau ya ai lam ni byin lai sai lam chye lu ai.