Mungmasha marai lahkawng bawm kabye kapaw la ai majaw tsi rung du
Danai Muklum na mungmasha marai lahkawng gaw, January shata 7 ya shani hkying 1:00am aten daram hta Nga hkwi sa ai lam kaw kadai hkam da ai re n chye lu ai hkam bawm langai kabye kapaw la ai lam chye lu ai.
Bawm kabye kapaw la ai yan gaw, Salang La Gawt Hkun Seng Danai Ginsa Ra lawk na rai nna Salang Magawng La Pa gaw Danai RCM hpyen yen dabang na re, shan gaw Danai hka makau na la bram hka nawng de Nga hkwi sa wa ai lam kaw byin ai re.
Salang La Gawt Hkun Seng gaw lagaw lahkawng maga daw mat ai, Salang Magawng La Pa gaw Pai lagaw kaw hkra hkala ai, Salang La Gawt Hkun Seng hpe gaw Myitkyina tsi rung de shalai dat sai, Salang Magawng La Pa gaw Danai tsi rung kaw tsi tsi nga ai lam, Danai, RCM hpyen yen dabang lit hkam Sara Naw Tawng tsun ai.
Kadai ni hkam da ai re ngu tsun na mung, Myen ni du ai mung anhte nmu ai rai, Shanglawt ni du ai mung anhte nmu ai rai kadai ni re ngu tup hkrak tsun na yak ai, majan a majaw byin ai ngu sha mai tsun ai ga rai nga ai, ndai shara hta ya na zawn byin ai shawng nnan lang re laga shara de gaw byin ga ai nga nna, Sara wa matut tsun ai kawn chye lu ai.
