Mungmasha marai lahkawng point twotwo sinat hte gap sat hkrum
Mungmyit Sinli Ga ( Kachin Sub-state ) Tamunye Muklum, daw 2 hte daw 6 na Miwa amyusha marai lahkawng gaw, January 20 ya shani hta point twotwo sinat hte gap hkrum nna langai si, langai hkala ai lam chye lu ai.
Sinat gap hkrum ai yan gaw, Salang Hpung Lau Yung asak 40 ning jan, hte Shadang Hu De Bau asak 23 ning yan rai nna, Salang Hpung Lau Yung a hpa hka sun kaw hpun hta nga yang gap hkrum ai re.
Mabyin hpe Tamunye Muklum na salang langai ya na zawn tsun ai “hpun hta sa ai gaw shanhte marai masum re. Langai wa gaw nta de shat wa gan la ai laman byin ai re. Salang Hpung Lau Yung gaw dai shara kaw nan si mat nna, Shadang Hu De Bau gaw la pai lata hte la pai lagaw kaw hkra hkala ai, shi gaw Tamunye mungshawa tsi rung kaw tsi tsi hkamla nga ai”
Kadai ni gap ai re hpe gaw n chye ai, Salang Hpung Lau Yung gaw ndai mare hta ramma ningbaw galaw ai ram ram na sai re. Kadai gap ai re n chye ai majaw amu shawk na matu mung yak hkak nga ai, shi a moi mang hpe gaw January 24 ya shani makoi mayang na re lam, salang wa matut tsun ai kaw na chye lu ai.
