Mungmyit Sinli Ga hta Pyi Tu Tsit ni hpyen lahkawn nga

Mungmyit Sinli Ga ( Kachin Sub-state ) KIA Dap Ba 6, Dap Dung 9 ginra, Huhpyet mare hta September shata 25 ya shani kaw nna Pyi Tu Tsit hpyen hpung ni hpyen lahkawn nga ai lam chye lu ai.

Hpyen lahkawn nga ai ni gaw, Kawnghka Pyi Tu Tsit ni rai nna, Huhpyet mare kaw dap jung nga ai Pyi Tu Tsit Dung 5 ni re.

“Nta htinggaw langai mi hta marai (1) Pyi Tu Tsin hpyenla n galaw n mai nga hkan hpyi ma ai, hpyi yang n jaw ai nta htinggaw ni hkan gaw rim woi la ma ai” nga nna buga na Salang langai tsun dan ai.

Hpyen lahkawn ai lam hpe Kawnghka Pyi Tu Tsit wuhpung ni hkrai n re sha, laga Pyi Tu Tsit wuhpung ni mung hpyen lahkawn wa na re nga, shiga na lu ai lam, Salang wa matut tsun ai.

Mungmyit Sinli Ga gaw Pyi Tu Tsit wuhpung ni law law nga ai ginra rai nna, ndai Pyi Tu Tsit wuhpung ni hpe gaw Myen Hpyen Dap kawn jum tek nga ai re.