Mungmyit Sinli Ga (Kachin Sub-state) ginra hta gasat poi matut byin
Mungmyit Sinli Ga (Kachin Sub-state) KIA Masat (6) Dap Ba, Masat (36) Dap Dung ginra, Munggu Hpawng Seng, Myen Dang Bum kaw August shata 19 ya shana maga hkying 4:00pm aten kaw nna hkying 4:40pm aten hkra Gumshem Myen hpyen dap ni hte Kokang MNDAA ni gasat poi matut byin ai lam chye lu ai.
“Mani gasat poi byin ai Hpunggan mare makau hku nna Gumshem Myen hpyen ni kalang bai shamu shamawt htu shadut lung wa ai majaw, gasat poi bai byin ai” nga nna shawng lam na salang langai shana wa ai.
KIA Masat (2) Dap Ba, Masat (14) Dap Dung ginra hta mung, Nambyu Hka hte Namje Hka mazup kaw, dai ginra mayan shamu shamawt hkawm nga ai Hk.L.Y (74) Dap na Gumshem Myen hpyen dap ni hte KIA hpyen hpung ni August shata 18 ya jahpawt hkying 7:40am aten daram kaw nna hkying 9:00am aten daram du hkra gasat poi byin ai lam nga ai.
Gumshem Myen hpyen dap ni kawn hpyen shamu shamawt ai lam ding yang naw galaw nga ai majaw, Jinghpaw Mung hte Mungmyit Sinli Ga ginra ni hta gasat poi ni matut manoi naw byin nga ai re.
