Mungmyit Sinli Ga (Kachin Sub-state) ginra hta gasat poi matut byin
Mungmyit Sinli Ga (Kachin Sub-state) ginra hta hpyen shamu shamawt hkawm nga ai Gumshem Myen hpyen dap ni hte Kokang MNDAA hpyen hpung ni Hpawng Seng kyu hpyi bum kaw September shata praw (1) ya jahapwt hkying 8:3am aten kaw nna hkying 9:30am aten du hkra gasat poi laja lana byin ai lam chye lu ai.
Gumshem Myen hpyen dap, hpyen n-gun (100) daram hpung ni gaw, Kokang MNDAA hpyen hpung ni nga ai ginra de htu shadut htim gasat lung wa ai majaw, gasat poi byin ai re lam, dai ginra na salang langai tsun ai.
August shata 31 ya shani hta mung, jahpawt hkying 7:30am aten kaw nna hkying 9:00am aten laman hta, Munggu Ginwang, Naw Gu mare makau kaw Kokang MNDAA ni hte Gumshem Myen hpyen dap, Hk.M.Y (355) dap ni gasat poi byin ai majaw, Naw Gu mare na mungshawa htinggaw (50) daram Miwa jarit mayan de hpyen koi yen nga ai lam chye lu ai.
Ya aten Gumshem Myen hpyen dap kawn Jinghpaw Mung hte Mungmyit Sinli Ga ginra shara shagu hta hpyen shamu shamawt htu shadut ai lam dingyang galaw nga ai majaw, Wunpawng Mungdan Shanglawt Hpyen Dap (KIA) ni hte mung, gasat poi jahkring hkring byin nga ai re lam chye lu ai.
