Mungmyit Sinli Ga (Kachin Sub-state) ginra hta KIA hte Gumshem Myen hpyen dap ni gasat poi matut byin
Mungmyit Sinli Ga (Kachin Sub-state) KIA Masat (10) Dap Ba, Masat (17) Dap Dung ginra hta hpyen shamu shamawt hkawm nga ai Gumshem Myen hpyen dap ni hte KIA Dap Dung (17) hpyen hpung ni Pan Se Bum kaw September shata praw 5 ya shana maga hkying 4:10pm aten hta gasat poi byin ai lam chye lu ai.
Bang Hung maga kawn hpyen shamu shamawt pru wa ai dap mying nchye ai Gumshem Myen hpyen dap, hpyen n-gun (100) daram hpung ni hpe KIA hpyen hpung ni hkap gap gasat ai kawn gasat poi byin ai lam, shawng lam na lit nga ai salang ni shana wa ai.
September shata praw 4 ya shani hta mung, jahpawt hkying 10:50am aten hta, KIA Masat (17) Dap Dung ginra, Pang Ti maga kawn hpyen shamu shamawt pru wa ai Tatma (99) kata na Gumshem Myen hpyen n-gun (60) daram hpung ni hpe KIA hpyen hpung ni Byuha Kung kaw hkap gap gasat poi byin ai lam chye lu ai.
September shata praw 5 ya jahpawt hkying 5:00am aten kaw nna hkying 2:40pm aten laman hta mung, KIA Masat (36) Dap Dung ginra, Kokang MNDAA ni dap jung nga ai shara de Tatma (99) kata Ts.K.Hk (12, 17) dap na pawng hpawm hpyen hpung ni htu shadut wa htim gasat ai majaw, Hpawng Seng Kyu Hpyi Bum hte Loi Ngu Bum mayan kaw laja lana gasat poi byin ai re sha n-ga, gasat poi byin ai shara de Hpawng Seng hte Kokang hkran na Gumshem Myen hpyen dap ni kawn sinat laknak kaba gap garum ai re lam, dai ginra na lit nga ai salang langai tsun ai kaw na chye lu ai.
