Mungmyit Sinli Ga (Kachin Sub-state) ginra kata shinggyim ahkaw ahkang tawt lai ai lam law wa

Mungmyit Sinli Ga (Kachin Sub-state) hta nga ai jauman mungshawa ni gaw myen hpyen dap ni hte baw sang lak nak lang hpung ni a shinggyim ahkaw ahkang tawt lai ai hpe jahkring hkring hkrum sha nga ai re lam chye lu ai.

Lai wa sai July shata nhtoi 21 ya shani hta mung Lashi Je Naw hte Lahpai Zau Lum yan hpe Balawng hpyen hpung ni kaw nna mara kata rim woi mat nhtawm adup abyen zingri ai hte gumhpraw dam shawa sha ai lam byin lai wa sai re.

Ndai lam hte seng nna “Nanghpam ninghkap masing ngu mying gang nna mungshawa ni hpe zingri ai lam gaw grai nan ntara ai ngu mu mada ai. Tara Upadi hte maren mai galaw ai. Nanghpam ninghkap ai lam gaw galaw ra ai bungli re. Raitim n galaw ging ai ladat hte shanhte galaw taw nga ai re. Hpami raitim wuhpung langai mi hku nna ya na zawn tawt lai ai hpe lit la shangun mayu ai” nga nna Nam Hpak Ka mare, nanghpam ninghkap komiti kaw na Lahpai Htang Din tsun ai.

အရပ္ဘက္လူမႈအဖြဲ႔အစည္း kawn July shata 31 ya shani hta Mungmyit Sinli hta nga ai mungshawa ni hpe Balawng hpyen hpung ni mara kata rim mat nna adup zingri, jahkrit shama ai lam hte seng nna nra sharawng ai, ninghkap ai lam ndau laika shapraw da ai re.

“Anhte chyawm mi gaw rau nga rau pra shada rai nhtawm ya na zawn byin ai lam mung grai law sai. Hkam sharang ai lam ni mung grai law wa re majaw loi mi tsi tsi ra sai ngu ai masa hte grau na gaw shinggyim nau na masa hte yawng hpe myit shadum jahprang ai hte hpawn rai yaw shada ai hku nna ndau laika hpe shapraw dat ai re” nga nna sam mung ramma hpu awn Hkangda Naw Mai tsun dan ai.

2020 ning July shata laman hta Kutkai Ginwang kata na Ga Leng, Nam Hpak Ka hte Man Tung mare kaw na shayi num sha marai 3, asak nhpring ai ma kaji 2, la 3 hte yawng pawng mungshawa marai 8 hpe Balawng hpyen hpung ni mara kata adup zingri, jahkrit shama ai hte gumhpraw dam shawa sha ai lam ni byin lai wa sai lam ndau laika hta tang madun da ai.

Lai wa sai 2009 ning kaw nna mungshawa ni hpe mara kata rim, zingri ai lam nga lai wa sai raitim yawm wa ai lam nre sha grau grau na law jat wa ai rai nhtawm asak si sum ai mung lawm ai re.

Mungmyit Sinli Ga (Kachin Sub-state) gaw Jinghpaw Wunpawng Myusha ni sha n ga, Balawng, Sam, Miwa hte Gala nga nna amyu baw sang hkum hkra, jiwoi jiwa prat kaw nna rau jawm nga lai wa ai shara re.

July shata 31 ya shani hta Balawng ni hte seng nna shapraw da ai ndau laika gaw Jinghpaw Wunpawng Myusha ni hkrai dinghkrai shapraw ai nre sha, shinggyim nau na hpe hkra machyi shangun ai lam nra sharawng ai wuhpung (46) tup myit hkrum nna galaw shapraw da ai re lam chye lu ai.