Mungmyit Sinli Ga (Kachin Sub-state) KIA Dap Ba (4), Dap Ba (6) ginra ni hta gasat poi matut byin
Mungmyit Sinli Ga (Kachin Sub-state) KIA Masat (6) Dap Ba, Masat (36) Dap Dung ginra hta shamu shamawt hkawm nga ai Gumshem Myen hpyen dap ni hte Kokang MNDAA hpyen hpung ni August shata 18 ya shani hkying 10:25am aten kaw nna hkying 11:30am aten laman hta, Na Het Pa kaw gasat poi byin ai lam chye lu ai.
Gumshem Myen hpyen dap Hk.M.Y (518) dap na hpyen n-gun (160) daram hpung ni gaw, hpyen shamu shamawt ai lam matut galaw wa ai majaw, MNDAA ni hte gasat poi bai byin ai rai nna, shana maga hkying 2:30pm aten hta mung, Myen hpyen ni bai matut shamu shamawt lung wa ai majaw, Man Kawng hte Loi Wing lapran kaw numdaw mi gasat poi bai byin ai lam, shawng lam na lit nga ai salang langai shana wa ai.
KIA Masat (4) Dap Ba, Masat (34) Dap Dung ginra hta mung, Lahkyang Yang mare makau kaw August shata 16 ya shani hkying 10:30am aten hta, Hk.L.Y (148) dap na Gumshem Myen hpyen hpung ni hte KIA hpyen hpung ni gasat poi byin ai re.
August shata 15 ya shani hta mung, Na Het Pa kaw sha Kokang MNDAA ni hte Gumshem Myen dap Hk.M.Y (518) dap ni gasat poi byin ai lam chye lu ai.
Ya aten Mungmyit Sinli Ga ginra hta Gumshem Myen hpyen dap kawn hpyen shamu shamawt ai lam matut galaw nga ai majaw, KIA, MNDAA hpyen hpung ni hte gasat poi matut byin nga ai re.
