Mungmyit Sinli ginra hta gumshem Myen hpyen dap ni hpyen arung arai ding yang naw sa nga

Mungmyit Sinli Ga (Kachin Sub-state), KIA Masat (6) Dap Ba, Masat (9) Dap Dung ginra hta gumshem Myen hpyen dap ni hpyen arung arai ding yang naw wa sa nga ai lam chye lu ai.

November shata 29 ya shana hkying 6:00pm aten daram hta Kuthkai Byuha kaw dap jung shara jahkrat nga ai gumshem Myen hpyen dap kaw, Y-12 nbungli hte gumshem Myen hpyen dap ni hpyen arung arai wa jahkrat ai lam, lit nga ai salang langai tsun ai.

November shata 29 ya shani hta sha Muse kaw na rawt lung wa ai, gumshem Myen hpyen dap ni hte MNDAA, AA pawng hpawm hpyen hpung ni 105-Mile mare kata gasat gala majan byin ai re.

Matut nna November shata 28 ya shani 105-Mile mare kaw gumshem Myen hpyen dap ni Jet Fighter hte numdaw lahkawng lang wa gap kau da ai lam matut chye lu ai.