Mungmyit Sinli ginra hta KIA hte Gumshem Myen Hpyen Dap ni gasat gala majan matut byin
Mungmyit Sinli Ga, (Kachin Sub-state) KIA Masat (10) Dap Ba, Masat (2) Dap Dung ginra hta, Nam Maw maga kawn pru wa ai Gumshem Myen Hpyen Dap, Hk.M.Y (109) dap na hpyen n-gun (40) daram re hpung ni hte KIA hpyen hpung ni July shata 19 ya jahpawt 9:24am aten kaw nna 10:30am aten laman, Bang Ding mare dingsa kaw gasat gala majan byin ai lam chye lu ai.
Gasat gala majan byin ai shara de Mung Ji mare kaw dap jung nga ai Gumshem Myen Byuha dap kawn laknak kaba 105mm hte (11) lang gap garum ai lam, shawng lam na lit nga ai salang langai tsun ai.
July shata 18 ya shani hte July shata 19 ya shani hta mung, Mungmyit Sinli Ga, KIA Masat (6) Dap Ba, Masat (36) Dap Dung ginra hta shamu shamawt hkawm nga ai Gumshem Myen hpyen hpung ni hte KIA ni Man Jak kadawng kaw gasat gala majan byin ai lam chye lu ai.
July shata 19 ya shani 1:00pm aten hta Nam Ya Hk.M.Y (12) dap kawn KIA Masat (9) Dap Ba, Masat (44) Dap Dung ginra, Hkum Tsai Zup mare maga de 82mm (3) lang gap bun ai lam chye lu ai.
