Mungmyit Sinli ginra hte Kokang ginra shara ni hta dap jung nga ai gumshem Myen hpyen dap hpe MNDAA, TNLA hte AA pawng hpawm hpung ni sa htim gasat
Mungmyit Sinli ginra hte Kokang ginra ni hta dap jung nga ai gumshem Myen hpyen dap ni hpe October shata 27 ya jahpawt hkying 4:00am aten daram kaw nna, MNDAA, TNLA hte AA pawng hpawm hpung ni sa htim gasat ai lam chye lu ai.
MNDAA, TNLA hte AA pawng hpawm hpung ni sa htim gasat ai shara ni gaw, Munggu, Hpawng Seng, Namhkam, Deng 13, Kutkai, sinli, Lashio, Loi Dau, Laukai, Hubang, Tamungnye, Mungji, Namjarap hte Nati mare ni kaw dap jung nga ai gumshem Myen hpyen ni hpe aten langai kaw sha sa htim gasat ai lam chye lu ai.
Gasat poi byin nga ai ten hta Namhpakka kaw dap jung nga ai gumshem Myen hpyen dap Hk.L.Y (123) dap kaw nna mung, mungshawa ni nga ai maga de laknak kaba hkrup mara gap shadam dat ai hta Namhpakka mare lawk (4) na nta 2 kaw wa hkrat kapaw ai lam nga ai.
Laknak kaba si wa hkrat kapaw ai hta asak 32 ning re ai num hte Ma kasha langai si sum mat nna, hkra hkala ai masha marai 6 re. Ndai hkra hkala ai marai 6 gaw Namhpakka tsi rung kaw tsi tsi hkamla nga ai lam chye lu ai.
Ndai zawn gasat poi byin ai hta Laukai Myo, Miwa jarit mayan kaw dap jung nga ai gumshem Myen dap hpe MNDAA hpyen hpung ni sa htim gasat zing la lu sai hte gasat poi byin nga ai Lashio lam kaba hpe MNDAA wuhpung ni kaw nna, lam pat tawn da ai lam hpe mung matut chye lu ai.
