Mungmyit Sinli Majoi, Bum Sumshi Manau poi kaba galaw
Sam Mung, Wunpawng Laili Laika hte Htunghking Hpung ni woi awn nhtawm, Mungmyit Sinli Majoi, Bum Sumshi manau poi kaba hpe April praw 3 ya shani kaw nna praw 6 ya shani du hkra, Kuthkai pa lawk ( 8 ) kaw na Wunpawng Htunghking Manau Wang kaw galaw na re lam, poi shabyin shatai komiti ni kawn chye lu ai.
Manau poi galaw ai a yaw shada lam hpe Mungmyit Sinli Ga, Htunghking Hpung Ningbaw rai nga ai Sara Lashi La tsun ai hta, Ndai Mungmyit Sinli Ga gaw shaning law law kaw na anhte a kaji kawa Wunpawng Du ni shanhte woi awn ai hte uphkang hkrat wa ai shara re. Ndai gaw anhte ya she masha nlaw ai zawn rai tim mung, moi kaw na anhte madu ai buga re majaw, anhte gaw madu majing re ngu hpe madun mayu ai lam re. Anhte a kaji kawa ni hpe ndai zawn re lamu ga hkrak ai shara kaw e, Sali wunli hku nna anhte hpe hkringhtawng jaw kau da ai kaji kawa ni hpe chyeju shakawn ai, Karai Kasang hpe mung chyeju dum shakawn ai hku nna anhte Sali wunli la ai manau poi kaba re.
Ndai ga e nga ai Sam, Balawng, Miwa hte laga Amyu ni hpe anhte gaw madu majing re ngu hpe chye shangun mayu ai. Ndai manau a majaw ndai Amyu ni gaw labau hkringhtawng lu ai ni re ngu ai hpe chye shangun mayu ai majaw galaw ai re.
Lai wa sai 1945 ning hta Japan hpe dang nna, Amyu sha ni yawng shang lawm ai manau nau lai sai, dai hpang 1947 ning a hpang daw gaw Kachin Sub-State Kongsi ngu ai Du ni woi awn nna shaning shagu nau ai re. 1962 ning a hpang, gumlang hpyen asuya ni zing ai kaw na atsawm rai nlu nau sai, 1981 ning hta Party Kongsi ni woi awn nna kalang mi nau ai gaw hpang jahtum rai nna, dai ning she mungshawa yawng myithkrum hte shanglawm ai manau poi kaba re majaw Mungmyit Sinli Majoi ngu shingteng amying lang ai gaw shawng nnan lang na manau poi kaba re lam, sara wa matut tsun ai kawn chye lu ai.
April praw 3 ya shani gaw manau htingnu hte madun gawk ni hpe dingshawng akyu hpyi hpawng galaw nna manau nau ai hpe praw 4 ya jahpawt hkying 10:00am aten kaw nna hkying 12:00non du hkra kalang, shana daw hkying 2:00pm aten kaw na hkying 4:00pm aten du hkra kalang lahkawng ya tup manau na re.
Praw 6 ya shani gaw Htunghking hpe woi awn ai ningbaw ningla ni, seng ang ai wuhpung wuhpawng kaw na ningbaw ningla ni hte Hpung hpe woi awn ai ningbaw ningla ni hku nna, Mungmyit Sinli Ga na Wunpawng sha ni a shawnglam masing ni hpe bawngban ai hpawng galaw nna manhkrum lu sha lamang mung galaw na re lam chye lu ai.
