Mungna Lawang Buga, Ramma shawa sharin hpawng galaw
Mungna Lawang buga ramma komiti ni kaw nna, woi awn galaw ai ramma shawa sharin hpawng hpe May shata 19 ya shani hkying 9:00am aten kaw nna, 21 ya shani du hkra Mungna Lawang buga hkalup hpung nawku jawng kaw galaw nga ai re lam chye lu ai.
Hpawng a yaw shada lam hpe Ningtau Ramma Hpa-awn Sara Bala Ja Gun tsun ai hta “COVID ana a majaw, mung masa a majaw mung anhte ramma shada ganawn mazum lam ni grai ningra mat wa ai, jawngma nkau mi gaw jawng nlu lung ai dai hku rai nna, lam hkan e dam dam wam wam rai nga ai dai zawn re ni a matu madung grau nna anhte buga shada ramma ni ganawn mazum wa chye lu na matu, kaja ai lam de lu hkawm wa lu na matu yaw shada let galaw ai lam re” na tsun ai.
Sharin hpawng hta namhpam hte seng ai lam, ramma langai a chye gying chye mai ai sex a lam, htingbut htingra makau grup yin ni hpe gara hku makawp maga ra na lam, ramma hte sut masa lam, dawjau ai ladat ngu ai ga baw ni hpe sharit ya ai re lam sara matut tsun ai.
Sharin sara ni hku nna, Rev.Nyau Brang Mai, Sr.Chyahkyi James Naw Naw, Sr.Lamyaw Hawng Hkawng hte Sr.Nhkum Brang Awng ni sa du sharin ya ai lam chye lu ai.
Lai wa shaning hkan galaw ai lam nga ai raitim, 2019 ning hpang kaw na ana zinli hte mung masa amyu myu a majaw ramma hpawng nlu galaw mat ai rai nna, dai ning bai galaw ai hta ramma marai 100 jan sa du shang lawm ai lam chye lu ai.
