Mungshawa Dap shawa hkrum zup bawngban sanglang hpawng galaw ngut
KIO Ginjaw Laiza Muklum Padang Hkrun Lam Majan Masing Woi Awn Rung hta Mungdan kata, Mungdan shinggan nga, Mungshawa Dap shawa yawng marai ( 700 ) jan hte hkrum zup bawngban sanglang hpawng hpe July 15 ya shani kawn dai ni 17 ya du hkra galaw la lu sai hpe chye lu ai.
Zuphpawng hpe Hpung woi sara ni akyu hpyi nna hpang ai, KIO Ginjaw Tingnyang Up Malai Du Kaba Nbang La kaw na hpawnghpaw mungga shaga nna, Tsaban 21 panglung zuphpawng sa ai lam, KIO gaw UNFC malawm kaw na pru mat nna, Federal Political Negotiation Co-ordination Committee ( FPNCC ) hte pawng hpawm ai lam hpe sanglang dan ai.
KIC Amu Madu Du Up Jum Lahpai Zau Raw gaw, FPNCC hpaw shabawn hkrang hte အေထြေထြမူဝါဒ hpe sanglang dan ai.
Dap Awn Daju Du Kaba Gunhtang Gam Shawng kaw na mung, n-gun jaw mungga shaga ai, Bai KNO ningbaw Du Wa Bawmwang La Raw kaw na mung, n-gun jaw mungga shaga ya ai.
Dai hpang Maigan nga, Wunpawng sha ni hte Mungdan kata na shagun dat ai laika ni hpe hti shana ai lam, du sa ai mungshawa ni kawn ningmu jaw hpaji jaw, san ai lam ni hpe KIO ningbaw ni hku nna htai sanglang dan lam galaw mat wa ai.
Lahkawng ya tup hkrum zup bawngban ai hpe ginchyum la lu nna, ndau shabra laika hpe mung shapraw dat ai lam chye lu ai.
